Абдулла Рамиз Паша Къырымда 1765 сенеси догъду. Тасильни эм догъмуш Ветанында, эм де Тюркиеде алды. О юксек девлет вазифелеринде, бу джумледен махкеме – адлие идарелеринде хызмет этти. Бу, гъает буюк бильгили къырым эвляды, Османлы Императорлыгъы огюнде косьтерген хызметлери – ярарлыкълары ичюн, «Паша» девлет унванына наиль олду. Абдулла Рамиз Паша базы бир менбаларгъа коре, XIX-нджы юзйыллыкънынъ башларында, даа догърусы 1813 сенеси душманлары элинден эляк ола.
Абдулла Рамиз Пашанынъ огълу Иззет Эфенди, озюнинъ «Харита-йы Къапуданан-и Дерья» серлевалы тарихий эсеринде, бабасы акъкъында толу, тавсиятлы, меракълы малюматлар бере.
Эбет, Абдулла Рамиз Паша да, озюнинъ бир сыра къырымлы ветандашлары киби, эдебият иле огърашты. Шахсий фикирлерини, дуйгъуларыны кягъыткъа – шиирий сатырларгъа тёктю.
Абдулла Рамиз Пашанынъ иджадындан нумюнелер, илькиде 1846 сенеси Тюркиеде дюнья юзюни корьди.
Гъарыбым, би-кесим ёкъдур энисим Ахдан гъайры,
Пенахым дест-гирим къалмады Аллахдан гъайры.
* * *
Кимини севди Худа, кимини севдада къоду,
Гулю арайыш идип, Бульбулю къавгъада къоду.
Назм сатырлардаки базы сёзлерге изаат:
би-кесим – кимсесизим
энисим – достум
пенахым – сыгъынмакъ
синеде ол дагълар ким – кокюсте о яралар ки…
дест-гирим – элимден туткъан
Категория
Источник
http://leylaemir.org/