Перейти к основному содержанию
урф-адетлеримизни унутмайыкъ

ДЖАШЛЫКЪКЪА

Аркъадашлар, джигитлер бугунь бизнинъ,

Бизмен бирге, акъызлар, эм де сизнинъ,

Энъ биринджи борджумыз джигит болмакъ,

Гъаемизчюн джан къыйып къанлы болмакъ.

 

Тюфеклернинъ, топларнынъ атылгъаны,

Къызыл къанлар сувларгъа къатылгъаны,

Ёкъса бизге бир огют болмадымы,

Ёкъса къуллукъ куньлери толмадымы?!

 

Джанъы дюнья, джанъы кунь, халкъ да джанъы,

Ярыкъланды къартайгъан шаркънынъ танъы,

Джаш джуреклер бизлерге «айдынъыз», дей,

«Юкъладынъыз, янълыш кунь сайдынъыз», дей.

 

«Тюфек, китап тюшмесин къолунъыздан»,

«Сизни кимсе къайтармаз джолунъыздан»,

«Тюрлю маска кийгенни атынъыз», дей,

«Козьяшларгъа ал къанын къатынъыз», дей.

 

«Гъаенъ ичюн къан акъыз, заман джашы»,

«Къандыр акънынъ йыкъылмаз темель ташы»,

«Хайинлерни къайырып соймакъ керек»,

«Джуртын йыкъып неслини джоймакъ керек».

 

Аранъызда хайинлер къалмагъан сонъ,

Халкъ ишине ич аякъ чалмагъан сонъ,

«Къол тутушып, бирликип кетинъиз», дей,

«Мазлум шаркъны сиз азат этинъиз», дей,

 

— Мына бизим борджумыз иште, джашлар,

Бугунь энди ишлемей эски башлар,

Джанъылыкъкъа татарны тартмакъ керек,

Арамызда джигитлер артмакъ керек.

 

Къоркъакълардан сырамыз темиз болсун,

Къоркъакъ уйде отурсын, семиз болсун,

Биз олардан айрылып кетмелимиз,

Джигитликни шай исбат этмелимиз.

 

Барсын ольсин къач мильён къансыз инсан,

Мезар болсын орталыкъ джансыз инсан,

Тек бир тугуль, бинъ кере ольмелимиз,

Бинъ олюмле джанны бинъ больмелимиз,

 

«Дипломатлар, токътанъыз сизлер энди»,

«Сизге эсир тугульмиз бизлер энди»,

«Фельсефесин дюньянынъ джояджакъмыз»,

«Авропанынъ итлерин сояджакъмыз».

Январь 1, 1921

Категория

Источник
http://anaurt.com