Перейти к основному содержанию
урф-адетлеримизни унутмайыкъ

 

КЪАРАСУВ
Къарасув акъкъында бир шей язмагъаным ичюн опькелеген Чобан къызы Зелиха тотайгъа
 
Ай, Къарасув, Къарасув, къарт Къарасув, 
Сен Дженнетнинъ тёрюне къурулгъансынъ, 
Джайлавлардан козюнъе чалт бара сув, 
Джаш чагъынъда джуректен урулгъансынъ.
 
Къарувлысынъ Къарасув къартайсанъ да, 
Топрагъынъда азизлер джайрап джата, 
Бугунь зеки кучюнъни джокъ сайсанъ да, 
Сенден чыкъкъан джигитлер эрлик сата.
 
Къарасувда къартанам къар джалагъан, 
Ят-ябанджы татарны къорлагъанда, 
Душман сени айлакъ да пек талагъан, 
Сыкъыштырып Къырымны зорлагъанда,
 
Пешман эттим мен сенден кеткениме, 
Айланаджакъ мен сагъа къайтаджакъман, 
Танърым шахид шай емин эткениме, 
Дертлеримни тек сагъа айтаджакъман.
 
Къарасувнынъ кузьдеки тойларында, 
Боткъа пише, пирничтен я да тюйден, 
Къызлар джурер аралыкъ бойларында, 
Тойлардан сонъ къызлары чыкъмаз уйден.
 
Къарасувнынъ джашлары тойларында, 
Джырлагъанда эвлерни зирильдетир, 
Мырза, къара ёкътыр ич сойларында, 
Чингенеси давулны гурюльдетир.
 
Къарасувнынъ бульвары, къарагъачы, 
Мелевшелик, чичеклик, шаир джурты, 
Лякин бугунь къуругъан дал агъачы, 
Оны ичтен кемирген сыртнынъ къурты.
 
Къарасувнынъ дёрт гулю, Акъ-Кьаясы, 
Хан джамиси оксюздай монълы тура, 
Денъишмеген ичте де кок боясы, 
Къарасувгъа баргъанда, джурек ура.
 
Ай, Къарасув, Къарасув, къарт Къарасув, 
Къоркъма кене тирильдинъ, яшайджакъсынъ, 
Учьлю-дёртлю эгизле, арт Къарасув, 
Джанъы ачкъан бир гульге ошайджакъсынъ.
Февраль 19, 1921
 

Категория

Источник
http://anaurt.com