Перейти к основному содержанию
урф-адетлеримизни унутмайыкъ

 

Бекир Чобан-заде адына мукяфат Низамнамесининъ талабы боюнджа  2008 сенеси мукяфаты ичюн муэллифлер тарафындан  такъдим этильген эсерлер 2009 сенеси март 1-ге къадар къабул этильдилер. Нетиджеде, комиссиягъа 22 эсер тюшти.

Бекир Чобан-заде адына мукяфат комиссиясынынъ 2009 сенеси  март 11 куню кечирильген невбеттеки топлашувында  комиссиягъа тюшкен эсерлер ве такъдимнамелер козьден  кечирилип, конкурскъа 17 эсер сечилип алынды. Конкурскъа Бекир Чобан-заде адына мукяфатнынъ айры номинациялары боюнджа ашагъыдаки намзетлер сечильди:

1. Къырымтатар тилинде энъ яхшы шиирлер китабы (я да шиирлер дестеси) ичюн.

а). Иса Абдураман. «Тамыр». Шиирлер, поэмалар, балладалар джыйынтыгъы.

б). Билял Мамбет. «Дагъ чокърагъы». Эфсанелер джыйынтыгъы.

в). Айше Кокиева. «Талийим меним».  Шиирлер джыйынтыгъы.

г). Садыкъ Аджи-Селимов. «Кечкен куньлер». Дестан.  Муэллифнинъ озю тарафындан ресимлернен безетильген.

2. Къырымтатар тилинде энъ яхшы несир (шу джумледен публицистик) эсерлер ичюн.

а). Закир Къуртнезир.  «Юрек агърылары». Эссе, публицистика.

3. Къырымтатар тильшынаслыгъы (дерслик, лугъат) боюнджа энъ яхшы ильмий иш, къырымтатар эдебиятшынаслыгъы боюнджа энъ яхшы тедкъикъат ве энъ яхшы эдебий-тенкъидий эсерлер ичюн.

а). Шевкет Юнусов. «Назмиетимиз ве несирджилигимиз». Тедкъикъат.

б). А. Эмирова, Э. Гъаниева, Н. Сейдаметова. «Тильшынаслыкъ терминлери лугъаты».

в). Эмине Гъаниева. «Къырымтатар тильшынаслыкъ терминлери». Лугъат.

г). Аллахманлы Махмуд.  «Ашыкъ Умернинъ яратыджылыгъы». Тедкъикъат. Азербайджан тилинде.

д). Энвер Озенбашлы.  «Айтымлар лугъаты». Фразеологизмлер (Сёз бирикмелери лугъаты).

4. Къырымтатар шаирлерининъ шиирий эсерлерининъ башкъа тиллерге ве башкъа миллет шаирлерининъ къырымтатар тилине энъ яхшы терджимелери ичюн.

а). Азаде-Айше Рорлих. И. Гаспринский. Френкистан ве Африка мектюплери».  Инглиз тилине терджиме.

5. Бекир Чобан-заденинъ фаалиетини кениш тешвикъат этюв (популяризлев) ичюн.

а). Мерзие Халитова. «Квартет памяти Бекира Чобан-заде».  Струнный квартет.

б). Февзи Алиев. «Бекир Чобан-заденинъ йырлары».  Бекир Чобан-заденинъ шиирлерине язылгъан йырлар.

6. Къарасувбазарнынъ кечмишини, бугуни ве келеджегини энъ яхшы суретте акс эткен эсерлер, публикациялар, тедкъикъатлар ичюн.

а). Мерзие Халитова. «Легенда Карасубазара. «Ак-Кая».  Фортепиано ичюн эсер.

7. Къырымнынъ тарихы, этнография ве санъатшынаслыкъ саалары боюнджа энъ яхшы тедкъикъат ичюн.

а). Исмет Заатов. «Крымскотатарские художники».  Джыйынтыкъ-альбом.

б). Улькер Мусаева. «Народный учитель».  Документальный очерк деятельности выдающегося крымскотатарского просветителя Усеина Боданинского.

в). Гульнара Бекирова. «Крымские татары. 1941-1991».  Опыт политической истории. 1-джи джылт.

Бойлеликле, комиссиягъа тюшкен 22 эсерден конкурста иштирак этмек ичюн 17 эсер сечильди.

Комиссия иджаткярларны агъымдаки 2009 сенеси Бекир Чобан-заде адына мукяфат ичюн конкурста фааль иштирак этмеге чагъыра.

Бунынънен бирге комиссия шуны да къайд эте ки, базы муэллифлер конкурскъа олдукъча саде ве ич бир номинациягъа уймагъан эсерлерни такъдим эткенлер. Илериде муэллифлер ве эсерлерни мукяфаткъа ресмий суретте такъдим эткенлер бунъа айрыджа эмиет беререк, биринджиде бу ишке олдукъча джиддий янашмакъ ве комиссиягъа такъдим этиледжек эсерлернинъ бедиий севиеси ве ичтимаий эмиети юксек дереджеде олмасыны эсапкъа алмакъ кереклер. Экинджиде исе, такъдим этильген эсерлер мытлакъа газеталарда илян этильген мукяфат Низамнамесинде косьтерильген бир де-бир номинациягъа уйгъун олмалары ве такъдимнамеде шу конкрет номинация косьтерильмеси шарт.

Конкурскъа сечильген эсерлер акъкъында фикирлер комиссиягъа майыс 1-ге къадар еткизильмели. Комиссия, матбуатта да, хусуан ана тилинде чыкъкъан газеталарымызда бу эсерлер акъкъында чокъча фикирлер бильдирильмесини ве бунда эдебиятшынасларнынъ, тильшынасларнынъ, тарихчыларнынъ, санат эрбапларынынъ фааль иштирак этмелерини беклей.

Мукяфат ичюн конкурс нетиджелери майыс айынынъ башында илян этиледжек.

Категория

Источник
http://www.yanidunya.org