Перейти к основному содержанию
урф-адетлеримизни унутмайыкъ
УЗАКЪ ТАВЛАР
Сиз де мени ойлайсызмы? 
Джаныкъ джырлар джырлайсызмы? 
Гизли, гизли джылайсызмы? 
Коклерге тап еткен тавлар. 
Джылагъан, зикр эткен тавлар.
 
Кене сенден джаш атлылар кечеми? 
Къана-къана чокърагьынъдан ичеми? 
Кене сенде эр заман шай кечеми? 
Периге дуракъ тавлар, 
Эренге ятакъ тавлар.
 
Аталарым эп баврынъда комюльди, 
Гузель козьлер эп кольгенъде джумулды, 
Ор куньлерде сенден медет умулды, 
Ал, ешиль къуббе тавлар, 
Джигитке тюрбе тавлар.
 
Ят эльге тюштим, сенден айрылдым. 
Не къарандым, не будандым, сарылдым, 
Не севильдим, не сыйпандым, сайылдым. 
Тувгъаным, козюм тавлар, 
Топрагъым, озюм тавлар.
 
Кене сиз шай чын коклерге тиесизми? 
Булутлардан чал къалпакълар киесизми? 
Гене сизге тырмашкъангьа кулесизми? 
Эр шейден буюк тавлар, 
Джигери куюк тавлар...
 
Сен юксексинъ, Танъры бере башта сагъа, 
Сен де акъыз, ич къызгъанмай, сабанджыгьа, 
Корьмесинлер балаларынъ ят босагьа, 
Акъ, ешиль, къара тавлар, 
Акъ, къызыл пара тавлар.
 
Сени корьсем, къарт айдамакъ болур эдим, 
Бир къаянъда тез саргьайып солур эдим; 
Бир кошенъде эп дюньяны унутур эдим. 
Онъгьаргьан, онъгъан тавлар, 
Къайнагъан, тонъгъан тавлар.

Категория

Источник
http://anaurt.com