Къырым мухтар джумхуриетинде хызмет косьтерген артист, "Къырым" адына къырымтатар фольклор ансамблининъ солисти
Белли къырымтатар йырджысы Дилявер Османов 15 яшындан башлап (1970 с.), яни музыка мектебинде аккордеон дерслерининъ 3-нджи сыныфында окъугъан вакъытлары, авескяр кеманеджи олгъан бабасы иле берабер, къырымтатарлар арасында халкъ тюркюлерини ве аваларыны топлап башлады. О отуз беш йыл зарфында, къырым миллий фольклорыны эм огренди, эм де дюгюнлерде йырлады - амельде (практика) тешкерип барды. "Хайтарма" оюн ве йыр къырымтатар ансамблинде чалышкъан чалгъыджыларнынъ – солистлернинъ бутюн пластинкаларыны динълеп чыкъты. Ал-азырда о, 600-ге якъын халкъ тюркюлерини ве 400 халкъ аваларыны иджра эте. Башкъаджа сёйлейджек олсакъ, Дилявер Османов къырымтатар музыка фольклорынынъ джанлы ташыйыджысы ве яшатыджысы эсап этиле..
Дилявер Османов, истидатлы чалгъыджы сыфатында озюнинъ иджадий профессиональ фаалиетини 1978 сенеси, Ташкент Девлет консерваториясында окъугъан девиринде башлады. О вакъытлары шеэр концертлеринде, "Хайтарма" ансамбли эркянында оркестр чалгъыджысы сыфатында иштирак эте эди. Чалгъы алетлери такъымы (оркестр) ве солистлер ичюн халкъ тюркюлерине ве аваларына бир къач аранжировкалар япты. О, консерваторияны окъуп битирген сонъ, Озьбекстаннынъ Гулистан шеэри музыка окъув юрдунда контрабас сыныфы боюнджа оджа чалышты.
Дилявер Османов 1988 сенесинден итибарен "Хайтарма" ансамблинде солист-вокалджы оларакъ чалыша. О озюни, музыка шекиллерини ве аньанелерини сакълагъан, халкъ тюркюлерине мукъайытлыкъле янашкъан, фольклор услюпте иджра эткен профессиональ вокалджы оларакъ косьтерди. Онынъ иджадий ишлерине Къырымнынъ чёль, дженюбий-ялыбою ве меркезий районлары тюркюлери, эм де созылып йырлангъан классик тюркюлер – макъамлар аиттир.
Дилявер Османов 1990 сенеси кенди бешиги – Къырымгъа къайткъан сонъ, Къырымтатар музыкалы-драмтеатросында эм оркестр чалгъыджысы, эм де чалгъы алетлери такъымынынъ солист-вокалджысы оларакъ фаалиет косьтерди. Санааткяр симфоник чалгъы алетлери такъымы ичюн янъыдан ишленген къырымтатар композиторларынынъ эсерлерини, бу джумледен Февзи Алиевнинъ "Хаялымдасынъ" йырыны юксек профессиональ севиеде иджра этип кельмекте. Чалгъы алетлери такъымынынъ аккордеонджысы ве вокалджысы сыфатында о, оркестр актёрлары ве чалгъыджылары топлулыгъы (труппа) иле берабер дефаларджа Тюркие, Романия, Алмания киби тыш мемлекетлери бойлап гастроллерде булунды.
Дилявер Османов 2002 сенесинден "Къырым" адына къырымтатар фольклор ансамблинде солист-вокалджы оларакъ чалыша. Йырджы энди о вакъытлары, "Чёль бульбули" намы иле белли эди. Айны шу йылы да, истидатлы санааткяр, "Къырым" ансамбли чалгъыджылары иле бирликте озю тертипке кетирген, эм де аранжировка япкъан ве иджра эткен "Ногъай бейитлери" денильген соло альбом чыкъарды..
Дилявер Османов 2004 сенеси аньаневий музыка "Макъам" ансамблинде чалыша. Санааткяр озюнинъ элли йыллыкъ юбилейи мунасебетиле, "Орнынъ джолы" адлы экинджи альбомыны ве Къырым ичерисиндеки чёль халкълары тюркюлеринден тертип этильген "Къырымнынъ чёль йырлары" серлевалы китабыны дердж япты. О шимди, "Къырымтатар музыка анталогиясы" серлевалы умумий джыйынтыкътан ер аладжакъ гъайры китапларнынъ нешири узеринде чалышмакъта эм де аит дисклер чыкъармакъ иле мешгъуль.
Дилявер Османов, къырымтатарларнынъ миллий санааты инкишафы огърунда япкъан хызметлери ичюн ве элли йыллыкъ юбилеий мунасебетиле, 2006 сенеси о, "Къырым Мухтар Джумхуриетинде хызмет косьтерген артист" Фахрий унваны иле такъдирленди. Бундан гъайры, белли санааткяр 2000 сенеси. Запарожье шеэринде отькерильген Халкъара миллий медениет фестивалинде вокал номинациясында Бир дереджели Диплом иле, 2005 сенеси Дагъстаннынъ Махачкала шеэринде кечирильген Халкъара "Ногъай Эль" Ногъай миллий медениет фестивали Дипломы иле мукяфатланды. О Къырымтатар музыкалы драма театросы эркянында, чалгъыджы ве ансамбль солисти сыфатында дефаларджа Тюркиеге, Романиягъа, Алманиягъа, Булгъарстангъа, Къазангъа, Москвагъа барды ве айны заманда Тюркиенинъ Силивке шеэринде олып кечкен Халкъара фестивальде иштирак этти (2003 с.).
Дилявер Османовнынъ акъикъатта, парлакъ ве чешит ренкли (колоритный) эм де юксекпрофессиональ санааткяр оларакъ танылувы, халкъ тюркюлерини озюне хас усталыкъле иджра этюв меарети онъа догъмуш халкъынынъ севги ве сайгъысыны къазанмагъа имкян яратты.
Qırım muhtar cumhuriyetinde hızmet köstergen artist, "Qırım" adına qırımtatar folklor ansambliniñ solisti
Belli qırımtatar yırcısı Dilâver Osmanov 15 yaşından başlap (1970 s.), yani muzıka mektebinde akkordeon dersleriniñ 3-nci sınıfında oquğan vaqıtları, aveskâr kemaneci olğan babası ile beraber, qırımtatarlar arasında halq türkülerini ve avalarını toplap başladı. O otuz beş yıl zarfında, qırım milliy folklorını em ögrendi, em de dügünlerde yırladı - amelde (praktika) teşkerip bardı. "Haytarma" oyun ve yır qırımtatar ansamblinde çalışqan çalğıcılarnıñ – solistlerniñ bütün plastinkalarını diñlep çıqtı. Al-azırda o, 600-ge yaqın halq türkülerini ve 400 halq avalarını icra ete. Başqaca söyleycek olsaq, Dilâver Osmanov qırımtatar muzıka folklorınıñ canlı taşıyıcısı ve yaşatıcısı esap etile..
Dilâver Osmanov, istidatlı çalğıcı sıfatında özüniñ icadiy professional faaliyetini 1978 senesi, Taşkent Devlet konservatoriyasında oquğan devirinde başladı. O vaqıtları şeer kontsertlerinde, "Haytarma" ansambli erkânında orkestr çalğıcısı sıfatında iştirak ete edi. Çalğı aletleri taqımı (orkestr) ve solistler içün halq türkülerine ve avalarına bir qaç aranjirovkalar yaptı. O, konservatoriyanı oqup bitirgen soñ, Özbekstannıñ Gülistan şeeri muzıka oquv yurdunda kontrabas sınıfı boyunca oca çalıştı.
Dilâver Osmanov 1988 senesinden itibaren "Haytarma" ansamblinde solist-vokalcı olaraq çalışa. O özüni, muzıka şekillerini ve ananelerini saqlağan, halq türkülerine muqayıtlıqle yanaşqan, folklor üslüpte icra etken professional vokalcı olaraq kösterdi. Onıñ icadiy işlerine Qırımnıñ çöl, cenübiy-yalıboyu ve merkeziy rayonları türküleri, em de sozılıp yırlanğan klassik türküler – maqamlar aittir.
Dilâver Osmanov 1990 senesi kendi beşigi – Qırımğa qaytqan soñ, Qırımtatar muzıkalı-dramteatrosında em orkestr çalğıcısı, em de çalğı aletleri taqımınıñ solist-vokalcısı olaraq faaliyet kösterdi. Sanaatkâr simfonik çalğı aletleri taqımı içün yañıdan işlengen qırımtatar kompozitorlarınıñ eserlerini, bu cümleden Fevzi Aliyevniñ "Hayalımdasıñ" yırını yüksek professional seviyede icra etip kelmekte. Çalğı aletleri taqımınıñ akkordeoncısı ve vokalcısı sıfatında o, orkestr aktörları ve çalğıcıları toplulığı (truppa) ile beraber defalarca Türkiye, Romaniya, Almaniya kibi tış memleketleri boylap gastrollerde bulundı.
Dilâver Osmanov 2002 senesinden "Qırım" adına qırımtatar folklor ansamblinde solist-vokalcı olaraq çalışa. Yırcı endi o vaqıtları, "Çöl bülbuli" namı ile belli edi. Aynı şu yılı da, istidatlı sanaatkâr, "Qırım" ansambli çalğıcıları ile birlikte özü tertipke ketirgen, em de aranjirovka yapqan ve icra etken "Noğay beyitleri" denilgen solo albom çıqardı..
Dilâver Osmanov 2004 senesi ananeviy muzıka "Maqam" ansamblinde çalışa. Sanaatkâr özüniñ elli yıllıq yubileyi munasebetile, "Ornıñ colı" adlı ekinci albomını ve Qırım içerisindeki çöl halqları türkülerinden tertip etilgen "Qırımnıñ çöl yırları" serlevalı kitabını derc yaptı. O şimdi, "Qırımtatar muzıka antalogiyası" serlevalı umumiy cıyıntıqtan yer alacaq ğayrı kitaplarnıñ neşiri üzerinde çalışmaqta em de ait diskler çıqarmaq ile meşğul.
Dilâver Osmanov, qırımtatarlarnıñ milliy sanaatı inkişafı oğrunda yapqan hızmetleri içün ve elli yıllıq yubileiy munasebetile, 2006 senesi o, "Qırım Muhtar Cumhuriyetinde hızmet köstergen artist" Fahriy unvanı ile taqdirlendi. Bundan ğayrı, belli sanaatkâr 2000 senesi. Zaparojye şeerinde ötkerilgen Halqara milliy medeniyet festivalinde vokal nominatsiyasında Bir dereceli Diplom ile, 2005 senesi Dağstannıñ Mahaçkala şeerinde keçirilgen Halqara "Noğay El" Noğay milliy medeniyet festivali Diplomı ile mukâfatlandı. O Qırımtatar muzıkalı drama teatrosı erkânında, çalğıcı ve ansambl solisti sıfatında defalarca Türkiyege, Romaniyağa, Almaniyağa, Bulğarstanğa, Qazanğa, Moskvağa bardı ve aynı zamanda Türkiyeniñ Silivke şeerinde olıp keçken Halqara festivalde iştirak etti (2003 s.).
Dilâver Osmanovnıñ aqiqatta, parlaq ve çeşit renkli (koloritnıy) em de yüksekprofessional sanaatkâr olaraq tanıluvı, halq türkülerini özüne has ustalıqle icra etüv meareti oña doğmuş halqınıñ sevgi ve sayğısını qazanmağa imkân yarattı.
Категория
Источник
http://anaurt.com