Перейти к основному содержанию
урф-адетлеримизни унутмайыкъ

 

Къуванайыкъмы, агълайыкъмы?
 
Шимдики заманда артыкъ бир шейге тааджипленмейсинъ. Хусусан сиясет деген шей бизим Къырым авасына пек бенъзей. Бирден денъише биле. Бунъа чокътан алышсанъ да, эписи бир, кимерде бекленильмеген сюрпризлер де ола.
Элиме бу йыл чыкъкъан янъы китаплардан базылары тюшти. Тюрлю-тюрлю дюльбер китаплар. Олар арасында Акъмесджитте нешир олунгъан «Шедевры мусульманской архитектуры Крыма» адлы китап да бар. Гузель, къалын китап, ичинде бир чокъ эски ве къыйметли ресимлер, шу джумледен ренкли фоторесимлер де бар. Къыскъасы, полиграфия джеэтинден мукеммель, десем янъылмам. Амма китапнынъ муэллифлеринден бири Акъмесджит шеэр головасы Геннадий Бабенко олгъаныны корип шаштым. Икътисадият илимлери намзети, озь вакътында КПУ алий партия мектебини битирген Геннадий Александрович тарихчылар сырасына къошулып, мусульман мимарлыгъы боюнджа «шедевр» язаджагъыны кимсе беклемегендир. Китапнынъ экинджи муэллифи де бар - тарих оджасы, 39-нджы мектепнинъ директоры Валерий Дюличев. Олар экиси Къырым тарихы боюнджа китаплар сериясыны чыкъармакъ ниетинде олып, биринджи китапны къырымтатар мевзусына багъышлагъанлар. Къувана­йыкъмы, агълайыкъмы? Бир тарафтан «серия» бизден башлангъаны гонъюльге ят­къан адиседир. Дигер тарафтан - шеэр головасынынъ халкъымызгъа бойле шубели ильтифаты тюшюнджеге далдыра.
Эльбет де, Геннадий Бабенко дегенде онынъ янъы «шедеврини» дегиль де, халкъымызда ороспу адынен белли олгъан Екатерина II-ге эйкель къояджакъ шеэр головасыны хатырлаймыз. «Голова» бу гъаесини илле омюрге кечиреджек ола ве янъы китапта шеэрни абаданлаштырув боюнджа къоджаман планлары хусусында язаркен, джумледен: «Мы также в перспективе планируем восстановление памятника Екатерине II», - дей. Тат олмаса да, инат экен. Китапта муэллифлер Екатерина II-ни ботен ерде анъмайлар, гъалиба, чюнки «шедевр»де Екатерина II Къырымнынъ къуртарыджысы киби косьтериле: «Шагин-Гирей, видя сложность положения в своём государстве, обратился к Екатерине II с просьбой оставить в Крыму часть русских войск, которые расположились у Ак-Мечети». (с. 72); «Оценив всю сложность положения в Крыму, Екатерина II предпринимает необходимые меры. Вместо А. Прозоровского она назначает командующим русскими войсками А. Суворова, который являлся не только блистательным полководцем, но и мудрым дипломатом». (с. 74). (Бойле мисаллерни даа чокъ девам этмек мумкюн. - С.С.).
Умумен, муэллифлер китапта «набеги крымских татар на украинские земли» акъ­къында айтып, Миних, Ласси, Долгорукий, Румянцев, Суворов, Потёмкиннинъ Къырымда къырымтатарларгъа япкъан вахшийликлери акъкъында бир сёз биле язмайлар. Тарихчы «а»ны язгъан сонъ, «б»ны да язмакъ керек. Акс алда бойле тарихчы - тарихчы дегиль де, икътисадиятчыдыр.
Эльбет де, «севимли» шеэр головамыз озь муэллифдешинен шу китапны болдурмай азырларкен, баягъы менбалардан файдалангъанлар ве Къырым джамилерининъ, базы шеэрлерининъ тарихынен багълы бир чокъ малюмат кетирелер. Шеэрде Екатерина II-ге эйкель къоймакъ бу якъта турсын, Буюк джами къуруджылыгъы меселесинде къырымтатарларнынъ талапларыны назар-итибаргъа алмагъан шеэр головасы китап аркъалы бизге джамилеримиз акъкъында бир шей айткъаны кулюнчли корюне. Бойле «тарихчы»ларгъа шуны хатырлатмакъ истейим ки, къырымтатарлар туристлерни джельп этеджек экзотика дегиль де, Къырымнынъ тамыр халкъыдыр. Бутюн халкънынъ тарихы эсабына озюне сиясий реклама япмакъ олмаз. Къырымтатарлар узакътан келип, Къырым эалисине къошул­гъан Эали дегиль де, озь Ватанына къайтып кельген Халкътыр. Бу халкъ оны ер юзюнден силип ташлайджакъ олгъан ороспуларгъа эйкель дегиль де, Буюк джами къуруладжагъыны беклей. Тек бойле ишлер халкънынъ хайыр дуасына ля­йыкълар.
 
Сейран СУЛЕЙМАН.

Категория

Источник
http://www.yanidunya.org/