Эльвида, «Алтын булутчыкъ!»

«Геджеледи алтын булутчыкъ» адлы повесть 1981 сенеси язылгъан олса да, Горбачевнынъ перестройкасы ве демократиясы  заманында 1987 сенеси дюнья юзю корьди. «Библиотека журнала «Знамя» сериясында 1990 сенеси 500 000 нусхада басылды. Ондан эвель «Роман-газета»да дердж олунды. Акъикъаткъа сувсанлыгъы къанмагъан совет окъуйыджыларынынъ энъ севимли ве популяр эсерине чевирильди. Биз, къырымтатарлар ичюн де, бу эсер дешетли демир къапынынъ ачылышы олды. Эсердеки вакъиалар айны къырымтатарларнынъ башына тюшкен фаджиалы вакъиалар эди. Китап эр бир къырымтатар къорантасында пейда олды. Эр кеснинъ агъы­зында шу эсер ве бутюн бир халкъларнынъ акъсыз суретте  тувгъан Ватанындан сюргюн этильгени акъкъында лафлар юре. Эр кес бири-биринден: «Приставкинни окъудынъмы? Приставкинни окъудынъмы?», - деп сорай.

Иште, Анатолий Игнатьевич Приставкин кениш окъу­йыджылар кутьлесине бирден бойле танылды.

Миллетине бакъмадан, акъикъий зиялылар ойле ола ки, башкъа миллетлернинъ башына тюшкен бахытсызлыкъны озюнинъ башына тюшкен киби сая. Бойле хайыр-ихсан, къардашчасына мунасебет ойле адамларны даа юксекке котере. Бу - инсанлыкънынъ таянгъан тиремеси олса керек. Эбедиет къануны, дегенлери шу олса керек.

Бизим миллетимизнинъ де  башына бойле мусибетли куньлер тюшкенде янымызны алгъан, барсын, меселе сонъунадже чезильмесе де, бойле инсанлар, акъикъатпервер инсанлар олды. Олар укюметке тим-тик къаршы турмагъа озьлеринде джесарет булдылар. Бу - бизим куреш ёлуна минген халкъымызнынъ догъру ёлда экенини исбатлай эди.

Анатолий Приставкин, Сергей Баруздин, Булат Окуджава, Евгений Евтушенко (бу сененинъ июнь айында бир группа зиялыларымыз хал-къымыз адындан Е. Евтушенкогъа миннетдарлыкъ бильдиргенлери не гузель олды!), Тимур Пулатов, даа якъында вефат эткен даа бир буюк языджы Чингиз Айтматов бизим миллий давамызгъа четтен бакъып турмадылар. Биваста шу курешимизге къолтуттылар.

Артыкъ, Анатолий Приставкин арамызда ёкътыр. О, июль 11-де вефат этти. Сагъ олгъанларында, бойле инсанларгъа бутюн халкъымыз адындан ресмий шекильде айрыджа тешеккюр бильдирильдими, ёкъмы, белли дегиль. Амма чокъ языкъ. Ич олмадым, вефатларындан сонъра адларыны итирам иле анъмагъа унутмайыкъ.

Анатолий Приставкин биринджи невбетте языджы оларакъ белли эди. Ола­джакъ языджы 1931 сенеси 17 октябрьде Москва виляетининъ Люберцы деген еринде догъды. Дженк йылларында ана-бабадан етим къалды. Балалар эвинде тербиеленди. Зенаат билим  юртунда окъуды. 14 яшында балалар эвинден къачты. Чешит ишханелерде чалышты. М. Горький адына Эдебият институтына окъумагъа кирди. «Юность» журналында ильк эсерлери басылды. 1987 сенеси илян этильген «Геджеледи алтын булутчыкъ» адлы повести онъа шурет кетирди. Бу эсер 1988 сенеси СССР Девлет Мукяфатынен такъдирленди. 1992 сенесинден РФ президенти янындаки афу этюв (помилование) комиссиясынынъ реиси ве 2001 сенесинден шу комиссиянынъ азасы вазифелеринде булунды.

Эльвида, Анатолий Приставкин! Эльвида, «Алтын булутчыкъ»!..

Къырымтатар

Языджылары бирлиги.