Перейти к основному содержанию
урф-адетлеримизни унутмайыкъ

 

Eşref Şemi-zade(1908–1978) 
"Qaygı"
Dolandım Qırımnıñ dağı, taşını,
Qayğı, asret sarğan ğarip başını,
Men söyleyim, sen sil közüñ yaşını,
Biz ökünmey kim ökünsin? – yandıq, qardaşlar!
Biz ağlamay kim ağlasın? – öldik, yurtdaşlar!
Er yerden silingen tatarnıñ adı.
Cennet Qırınıñ söngen çırağı,
Halqım, dep iñley taşı, toprağı,
Biz ökünmey kim ökünsin? – yandıq, qardaşlar!
Biz ağlamay kim ağlasın? – öldik, yurtdaşlar!
Çatırtavğa çıqtım, "oğlum qayda?" – dey,
Salğırdan suv içtim, "yavrum qayda?" – dey,
Hansarayğa kirdim, "halqım qayda?" – dey, 
Biz ökünmey kim ökünsin? – yandıq, qardaşlar!
Biz ağlamay kim ağlasın? – öldik, yurtdaşlar!
Er bir tatar evine yavurlar kirgen,
Babalar qabrine saban sürülgen,
Bu qadar hainlik qayda körülgen?! – 
Biz ökünmey kim ökünsin?
Yandıq, qardaşlar!
Biz ağlamay kim ağlasın? – öldik, yurtdaşlar!
Uçansuv quruğan, gül, bağçalar solğan,
Mektepler, camiler at ahır olğan,
Bülbül yuvasına qarğalar qoyunğan
Biz ökünmey kim ökünsin? – yandıq, qardaşlar!
Biz ağlamay kim ağlasın? – öldik, yurtdaşlar!
Aytıñ, dostlar, bu zulumğa yürek çıdarmı?!
Rus çızması bizni daim ezip turarmı?!
Vatan içün can berecek yigitler barmı?
Bar olsañız, yurt aşqına keliñiz, dostlar!
Analarnıñ köz yaşını siliñiz, dostlar!

Категория

Источник
http://anaurt.com