Перейти к основному содержанию
урф-адетлеримизни унутмайыкъ

Ана-Ватангъа къоранта ве балаларынънен берабер кочип келип, эвинъ де олса, буюк бир бахт. Кой еринде олса да, эв ве топракъ саиби олмакъ буюк бир къуванч.
Амма Ридван ичюн бу къуванч ве бахт бир куньден ёкъ оладжагъыны о даа бильмей эди. Бабасы вефат эткенде Ридван алты яшында кучюк ве шенъ огъланчыкъ эди. О даа балалы­гъына барып бу дюньяда бабадан оксюз къалгъаныны анъламай эди. Ридван татасы ве анасынен яшап, кой мектебине къатнап докъузынджы сыныфны битире.
Акъмесджитте окъумакъ истегини бильдире. О, шеэрдеки бир окъув юртунда тасиль алып башлай. Койден кельгени себебинден оны окъув юртунынъ ятакъханесинде ерлештирелер. Окъугъанда озю киби яш огъланларнен таныш ола ве учь йылдан сонъ диплом алып коюне къайтып келе.
Койде вакътынджа бир ишке кире. Лякин чокъкъа бармай Ридван анасынен келишалмай эвден чыкъып, Кезлев шеэрине кете. Кезлевде о машиналар ювгъан бир ишханеде ювуджы олып чалыша. Яш огълан буюк бир шеэрде булунып бир джинает япа. Милиция хадимлери оны къыдырып башлайлар, анасы яшагъан койге барып оны къыдыралар. Ридван озю де ярамай ёлгъа тюшкенини анълай ве милиция хадимлеринден къоркъуп, япкъан джинаетни тюшюнип, бир къач кунь чёльде сакълана.
Сыджакъ яз геджелерининъ биринде ач ве алсыз Ридваннынъ акъылына Халиде аласы келе ве о онынъ эвине ёл ала. Аласы Ридванны корип, козюнинъ огюнде рахметли догъмуш къардашы Сейдамет джанланды. Чюнки Ридван оськен сайын рахметли бабасына бенъзеп кете эди. Ридван башына кельген мешакъатлар акъкъында аласына айтты.
- Янълышмагъан тек бир Алла, сонъу хайырлы олсун, - деди Ридвангъа Халиде аласы.
Шу геджеси Халиде аласы юкълап оламады, бутюн ге­дже Ридвангъа насыл ярдым этейим, бунынъ сонъу не оладжакъ, деп ойланып чыкъты. Сабадан Ридван ве аласы милициягъа ёл алдылар.
Учь ай девамында хасталыгъына бакъмайып, Халиде аласы барыны-ёкъуны берип, Ридвангъа ярдым этмеге тырышты. Махкеме оладжакъ кунь де якъынлашты. Халиде аласы бутюн гедже танъгъа къадар бильген дуаларны окъуп Аллагъа ялварды. «Аллам, бабасыз оськен бу баланы тюрьме къапысындан къуртулмагъа ярдым эт», - деген сёзлеринен танъ да атты. Шу куню укюм чыкъарылып, къарар боюнджа Ридванны учь йылгъа шартлы джезаладылар. Бу вакъиадан сонъ Ридван Халиде аласынынъ эвинде яшамагъа къала.
Бир къач айдан сонъ Йылбаш байрамына беш кунь къалгъанда Ридван гедже аласынынъ топлагъан парасыны хырсызлап эвинден чыкъып кете. Аласы исе саба Ридваннынъ япкъаныны билип, озь-озюне: «Мерхаметтен дерт асыл», - деп окюр-окюр агълады.
Асан Мурадасилов,
Акъмечит районы, Къызыл Чонърав (Красная поляна) кою.

Категория

Источник
http://www.yanidunya.org