Перейти к основному содержанию
урф-адетлеримизни унутмайыкъ

 

Иса Абдураман

 

Далгъалар арасында

Денъиз, денъиз, денъиз -

Буюк къазан дерсиз.

Юрем онда ялдап.

Санки сонъсыз ёлдам.

Ёкътыр дуракъ, талда.

 

Бакъам онъгъа, солгъа -

Далгъа, далгъа, далгъа.

Чабик кетип алдгъа,

Деръал къайта арткъа.

Мени кери тарта.

 

Огде арзу - ялы.

Узакъ дегиль, якъын.

Етмек ичюн, лякин,

Керек ички акъым,

Керек ички ялын!

                   23.07.2005 с., Акъмесджит.

 

Юкселинъиз

(Кичкене достларыма)

Гульзар адлы умюдимнинъ гъонджелери -

Келеджекнинъ айдынлары, юджелери,

Къаранлыкъта пек эзилип, сизни анъсам,

Юрегимде джоша шу ань

Татлы ильхам.

 

Агълаяткъан кечмишиме мельэм олып,

Косьтеререк ярынымнынъ нурлу ёлун,

Башы тёбен бугунимни кульдюресиз.

Санки онъа коктен йылдыз эндиресиз.

 

Сиз осинъиз, сиз учынъыз къанат керип,

Бабаларгъа, деделерге такъат берип.

Йылмайынъыз улу куньлер танъы олып!

Юкселинъиз,

Халкъ, Ватаннынъ шаны олып!

                   31.08.2001 с., Акъмесджит.

 

Хаялларым санъа ете олып ель

Ерге бакъып, сен хаялгъа даласынъ.

Пек истейим хаялынъа кирмеге.

Ойчан юрип, къальпке арзу саласынъ.

Пек истейим оюнъ иле юрмеге.

 

Эгер дёнсенъ лятафетли акъ танъгъа,

Мен багърынъа энсем олып ышыкъ, нур.

Сени куньде къаврап шереф ве шангъа,

Десем, сенинъ олгъанынъа бинъ шукюр!..

 

Меним ичюн, эбет, къолай арз этмек.

Хаялларым санъа ете олып ель.

Манъа исе кучь къавушмакъ, кучь етмек.

Мен Ер олсам, сен Семасынъ, эй, гузель!

26.11.1992-12.04.2003 с.

Ташкент-Акъмесджит.

 

Тылсым сездим сесинъде

Олдынъ, дединъ, торунлы.

Корип кичик яврумны,

Унуттым дерт, агърымны!..

Алгъышладынъ такъдирни

Ве Баарьни анъдырдынъ.

 

Тылсым сездим сесинъде,

Атеш корьдим козюнъде…

Омюримнинъ кузюнде

Акъым кирди ичиме,

Дуйгъум джошты…

Не бу, не?!

09-12.10.2002 с.,

Акъмесджит.

Категория

Источник
http://www.yanidunya.org