Перейти к основному содержанию
урф-адетлеримизни унутмайыкъ

 

Озь макъалелеринде къырымтатар медениетининъ тикленюв адымларыны айдынлаткъан, рессамлар, сана йылдызлары акъкъында эеджанлы макъалелеринен белли журналист Гульнара Усеинова озь къалемини эдебиятта да сынамакъта. Гульнаранынъ бир къач икяеси 2000 сенеси Киевде украин тилинде нешир этильген «Сучасний пилигрим» джыйынтыкъта да ер алды, сонъра онынъ «Маневийликнинъ джанлы менбалары» очерклер джыйынтыгъы чыкъты. Кеченлерде исе «Доля» нешриятында Гульнаранынъ къырымтатар, рус ве украин тиллеринде икяелерининъ «Пейгъамбер дёгмелери» ильк икяелер джы­йынтыгъы  дюнья юзю корьди.
 
Муэллифнинъ кириш сёзюнде язылгъаны киби икяелерининъ эсас мевзусы  къырымтатар яш къадын-къызлары ве балаларынынъ ички дюньясыдыр. Керчектен де онынъ эр бир икяесинде назик, садыкъ, ирадели къырымтатар къадын образы джанланмакъта. «Тым-тым» адлы шаиране тильнен язылгъан икяесини окъур экенмиз, аман кеманесини багърына басып, тылсымлы музыка алеминде хаяллар къанатында учкъан рахметли Энвер Шерфединов козь огюмизге келе ве  биз санки тым-тымны эшиткен киби оламыз. «Пейгъамбер дёгмелери» икяесинден исе узун къыштан уянгъан баарьнинъ къокъусы келип, озь севгисине садыкъ къадыннынъ ички дюньясы, онынъ терен сакълы дуйгъулары айдынлатыла.
Гаспринский адына китапханеде кечкен афта шу китапнынъ такъдиминде чыкъыш япкъан шаир ве языджыларымыз Р. Фазыл, А. Велиев, У. Эдемова, И. Абдураман, Ш. Али, А. Кокиева, В. Басыров, бестекяр Ф. Алиев, журналистлер З. Бекирова ве З. Пинка, Информацион-медениет меркезининъ хадими С. Къандымова озь чыкъышларында Г. Усеинованынъ икяелерине юксек къыймет кестилер. Тедбирни усталыкънен алып баргъан китапхане окъув залынынъ мудиреси Л. Къадырова тедбирде керчектен де кучюк байрам муитини ярата бильди. Кезлевдеки санат мектебинде окъугъан къызчыкъ Лиляфруз Абибуллаева къырымтатар халкъ йырларыны йырлап, такъдимни яраштырды.

Категория

Источник
http://www.yanidunya.org/