Перейти к основному содержанию
урф-адетлеримизни унутмайыкъ

 

ЯРАЛЫ АКЪИКЪАТ
Балалыкъ чагъымны хатырлагъанда,
Келе козъ огюме копюрлер, ёллар.
Отьмюш хаялымны эп тырнагъанда,
Къулагъымда чынълай аджджы аизар!
Сталин бабамыз деп, йырлай эдик,
Эгер о олмаса, сёнеджек кунеш.
Ленинни пек сийрек хатырлай эдик,
Тек Сталин бизнен гедже-кунъдюз эш!
Биз оны белледик дюнъя диреги,
Балалыкъта олюм акълынъа тюшмей.
Инандыкъ, токътамай урар юреги,
Халкъларнынъ такъдирин къайгъырар даий.
Биз бала олайыкъ, балабанлар да,
Пейгъамбер сандылар Джугашвилини.
Намы ялдап юрьди енъиш, шанларда,
Чокълар унуттылар даий Ленинни!..
Яшындай урулды бир къара хабер,
Ичи янгъан киби эр кес къалтырай.
Санки бу яныкътан къарарды эр ер,
Солгъун черелерде козъ яш йылтырай.
Ягъмурлы кунъ эди о олъген куню,
Гуя табиат да курсюнди агъыр.
Кунеш ничюн кезмей севген коюни,
Нечюн токътамадан сепелей ягъмур?..
Галстугимизге тамды козъ яшлар,
Сталинсиз энди биз насыл яшармыз?
Агълап эвге къайтты мектепли яшлар,
— Елбашчысыз насыл адым ташлармыз?
Я бильмез эдик де — бу «акъылдане»
Халкъымнынъ тамрына балта ургъанын.
Дюнъяда озюни сайып екяне,
Лениннинъ ёлуны терске бургъанын.
Козъ яшынъны силъ деп, дарылды къартлар,
О къасабы олды миллион джаннынъ.
Онъа агълагъанлар гунягъа батар,
Ким корьген бу къадар джеллят инсанны.
Сталинни саргъан къара юреклер,
Сёзюне инанып арттан такъылгъан.
Олар достны душман, душманны дост дер,
Олардыр акъикъат къанатын къыргъан.
О мааль дертлерни кимге айтайыкъ,
Элемнен сырдаштыкъ, олмадыкъ саргъуш.
Тувгъан юртумызгъа насыл къайтайыкъ,
Тыршавлы эдик биз, къалъблерде къаргъыш.
Сонъ анълап башладым халкъым дердини,
Яралы акъикъат козюм огюнде.
Коксюмден быракътым матем шертини,
О кунълер акълымда аля бугунъ де,..
«Юртумыздан къувгъанларнынъ сокъур олсун
козьлери,
Мезарында окюрсинлер, раат ятмасын озьлери!
Бизлер киби бир тюрлю халкъ айрылыкълар
чекмесин,
Асретлилер насыл булсын тувгъан юртын,
озъ ерин!»
Халкъым, бойле талек, бойле къаргъышлар
Азмы ер алдылар гонълюнъ тёрюнден!
Тарихкъа яландан чызды нагъышлар,
Сени айыргъанлар ана еринъден!..
Кене ягъмурлы кунь, ёлдам мен кене,
Артта къалды нидже озен, копюрлер.
Кечмишни тюшюнсем, сабрым тюкене,
Келеджек несиллер бизге не дерлер?
Олар демезлерми, нечюн сустынъыз,
Хата тюзетмекни бизге къалдырып?!
Халкъ олеяткъанда, къайда пустынъыз,
Курешмей, адалет янында турып?!
Екъ, биз унутмадыкъ бабалар юртын,
Акъикъат ярасын мелъэмимиз биз.
Бугунъ курешлерде акъикъат устюн,
Ана юрт гуллерин эмелимиз биз!
Шукюр, тири къалды мерд халкъым меним,
Шахскъа табынувнынъ къурбаны олып,
Юртуна къавушыр халкъым, эминим,
Атланыр юртуна ёлларгъа толып.
 

Категория

Источник
http://anaurt.com