Перейти к основному содержанию
урф-адетлеримизни унутмайыкъ

 

ТЮРК ЯВРУСЫНА
 
 
Иште, яврум, шу корьдигинъ ал байракъ
Мазлум халкънынъ козь яшыдыр, ахыдыр.
Асырларджа пельтеленмиш, бирикмиш,
Къан ренкинде тамгъан юрек къаныдыр.
Иште, яврум, шу корьдигинъ ал байракъ
Факъыр халкънынъ козь бебеги, джаныдыр.
Акъкъы ичюн зинданларда чюрюген,
Шеит олып, оленлернинъ къаныдыр.
Иште, яврум, шу корьдигинъ ал байракъ
Эвеллери сюрюнирди ерлерде.
Факъат бугунь та коклере юксельмиш
Шаркъта, Гъарпта долашиюр сеферде!
Эльбет, яврум, шу корьдигинъ ал байракъ
Къан агълаян бир япракътыр тарихтан.
Бир къыгъылчым киби кокке фырланмыш 
Мазлумларнынъ къальбиндеки яныкътан.
Табын, яврум, байрагъынъа джанынъле,
Тарихына акъкъынъ бутюн язылсын!
Къылычынъле, къалеминъле, кучюнъле
Акъсызлыкъкъа терен мезар къазылсын!
(«Янъы Чолпан», № 1)

Категория

Источник
http://anaurt.com