Перейти к основному содержанию
урф-адетлеримизни унутмайыкъ

Бисмилляhир-Рахманир-Рахим. Аль-Хамду лилляhи Раббиль-‘алямин. Аллаhумма салли ‘аля Мухаммад. Ашhаду алля иляhа илляллаhу уа ашhаду анна Мухаммадар-Расулюллаh. Иттакуллаh.
Куль hууаллаhу Ахад.
Бу дюньяны озь Къудретинен яраткъан, ич кимсеге ве ич бир шейге ошамагъан, эр шейден эвель бар олгъан, къусурсыз, сынъырсыз, мекянсыз бар олгъан Аллаhу Таалягъа хамд-у сеналар олсун! О эр шейни билир, эр шейни эшитир ве корер!
Аллаhнынъ севимли къулу, имамларнынъ имамы, бизлерге догъру ёлны косьтерген Пейгъамберимиз Мухаммад Мустафа (солляллаhу алейhи веселлем)ге салят-у селямлар олсун!

Сайгъылы мусульманлар!
Озюме ве сизлерге тевсие этем ки, Аллаhтан къоркъунъыз, Шариатымызгъа коре яшанъыз, Аллаhнынъ эмирлерини ерине кетирип, ясакъ эткен шейлерден узакъ турынъыз!
Аллаhу Тааля Къуран-и Керимде буюрды:
يَا أَيُّهَا الَّذِينَ ءَامَنُوا اتَّقُوا اللهَ وَقُولُوا قَولاً سَدِيدًا يُصْلِحْ لَكُمْ أَعْمَالَكُمْ
وَيَغْفِرْ لَكُمْ ذُنُوبَكُمْ وَمَنْ يُطِعِ اللهَ وَرَسُولَهُ فَقَدْ فَازَ فَوْزًا عَظِيمًا
Манасы: «Эй, иман эткенлер! Аллаhтан къоркъунъыз ве догъру сёйленъиз. Аллаh ишлеринъизде даа чокъ хайыр берир ве гунахларынъызны багъышлар. Ким Аллаhкъа ве Пейгъамберге итаат этсе, буюк раатлыкъ корер».
Урьметли мусульманлар! Керчектен, Ислям - диний бильгилерге эсаслана. Такъвалы олмакъ ичюн, диний бильгилер алмакъ керек. Такъвалы олып ве Аллаhнынъ рахметине умют этип, озь арекетлеримизни контроль этмек керекмиз. Керчектен, Аллаhнынъ эмирлерини ерине кетирип, къыйынлыкъларгъа даянмакъ, Аллаhнынъ джезасына даянмакътан даа енгильдир.
Бу яшайыш кечиджидир, ве бу дюньяда олгъан эр шейнинъ сонъу бар. Ахиретте исе эр шей эбедийдир. Онынъ ичюн озюмизнинъ арекетлеримизни контроль этип, Эсабет кунюне азыр олмакъ керекмиз.

Сайгъылы мусульманлар!
Аллаhу Тааля Къуран-и Керимде буюрды:
وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولئِكَ هُمُ الْمُفْلِحُونَ
Манасы: «Яхшылыкъкъа ве итааткъа чагъыргъан ве яманлыкъны ясакълагъан уммет бардыр ки, керчектен, бу уммет хайырлы бир умметтир».
Пейгъамбер Эфендимиз (солляллаhу алейhи веселлем) буюрды:
مَنْ دَعَا إِلَى الْهُدَى كَانَ لَهُ مِنَ الأَجْرِ مِثْلَ أُجُورِ مَنْ تَبِعَهُ مِنْ غَيْرِ أَنْ يَنْقُصَ مِنْ أُجُورِهِمْ شَىْءٌ
Манасы: «Ким Акъкъат ёлунен кетмеге чагъыргъан олса,онъа озю ичюн савап языла ве бу ёлнен кеткенлер ичюн де савап языла, ве бу ёлнен кеткенлернинъ савабы эксильмей».
Ве Пейгъамбер Эфендимиз даа бойле деген эди:
الدّالُّ عَلَى الْخَيْرِ كَفَاعِلِهِ
Манасы: «Ким яхшылыкъ япмагъа чагъыргъан олса, о, бу яхшылыкъны япкъан дайын савап къазана».
Ким яхшылыкъкъа чагъырмакъ ичюн чокъ вакътыны масраф этсе, о балабан бир мираскъа наиль олды ве бу мирас — Пейгъамбер Эфендимизден бизге еткен диний бильгилердир. Энъ хайырлы инсанлар — бу, Аллаhкъа иман этмеге ве яхшылыкъ япмагъа чагъыргъан инсанлардыр ве олар Пейгъамбер Эфендимизнинъ янында олмагъа ляйыкълар. Энъ балабан хайыр — бу дюньяда ве Ахиретте бахтлы олмакътыр.
Сайгъылы мусульманлар!
Яхшылыкъны эмир этмек ве яманлыкъны ясакъламакъ — бу Ислямнынъ эсасларындан биридир. Яхшылыкъ недир? Яхшылыкъ — бу, Аллаh эмир эткен шейлернинъ япылмасыдыр. Аллаhнынъ эмирлерини ерине кетирген ве башкъаларгъа Онынъ эмирлерини япмагъа хатырлаткъан къулларыны Аллаh севе.
Яманлыкъ недир? Яманлыкъ — бу, Аллаh ясакъ эткен шейлернинъ япылмасыдыр. Бойле шейлерден, яни гунахлардан къачынгъан къулларыны да Аллаhу Тааля севе.

Пейгъамбер Эфендимиз (солляллаhу алейhи веселлем) буюрды:
لَيْسَ مِنَّا مَنْ لَمْ يَرْحَمْ صَغِيرَنَا وَيُوَقّرْ كَبِيرَنَا وَيَأْمُرْ بِالْمَعْرُوفِ وَيَنْهَ عَنِ الْمُنْكَرِ
Манасы: «Ким кучюклерге мерхаметли олмаса, буюклерни урьмет этмесе, яхшылыкъкъа чагъырмайып, яманлыкъны ясакъ этмесе, бизден (яни салихлерден) дегильдир».
Ве даа бир Хадисинде Пейгъамбер Эфендимиз шойле буюрды:
وَالَّذِي نَفْسِي بِيَدِهِ لَتَأْمُرُنَّ بِالْمَعْرُوفِ وَلَتَنْهَوْنَ عَنِ الْمُنْكَرِ وَلَتَأْخُذُنَّ عَلَى يَدِ الظَّالِمِ أَوْ لَيَبْعَثَنَّ اللهُ عَلَيْكُمْ عِقَابًا مِنْ عِنْدِهِ
Манасы: «Валлаhи, сиз яхшылыкъкъа чагъырмакъ, яманлыкъны ясакъ этмек ве зулумлыкъны токътатмакъ керексиз, ёкъса Аллаh сизге джеза берир».

Сайгъылы мусульманлар!
Пейгъамбер Эфендимиз бир Хадис-и Шерифинде айткъан эди:
” لَمَّا أَحْدَثَ بَنُو إِسْرَائِيلَ الأَحْدَاثَ نَهَتْهُمْ عُلَمَاؤُهُمْ فَلَمْ يَسْتَمِعُوا لَهُمْ، فَلَمْ يَمْنَعْهُمْ عَدَمُ اسْتِمَاعِهِمْ لَهُمْ مِنْ مُخَالَطَتِهِمْ وَمُوَاكَلَتِهِمْ فَلَمَّا فَعَلُوا ذَلِكَ ضَرَبَ اللهُ بِقُلُوبِ بَعْضِهِمْ عَلَى بَعْضٍ وَلُعِنُوا عَلَى لِسَانِ دَاوُدَ وَعِيسَى ابْنِ مَرْيَمَ عَلَيْهِمَا السَّلامُ “
Манасы: «Исраиль огъуллары гунах ишлеген сонъ, оларнынъ алимлери оларгъа буны япмагъа ясакъ эттилер. Амма олар бу ясакъкъа къулакъ асмадылар. Бундан сонъ алимлер олардан узакълашмайып, аксине, оларнен къатнашмагъа девам эттилер. Бундан да сонъ Аллаh оларнынъ юреклерини къаттырды ве Дауднен Иса алейhиселям Пейгъамберлер оларны лянет эттилер».

Билинъиз ки, башкъаларнынъ къусурларыны арамакъ бизим акъкъымыз ёкъ, амма яхшылыкъ япмакъны терк эткен инсанны биз яхшылыкъкъа чагъырмакъ керекмиз. Ве ачыкъ зулумлыкъ ве гунах япкъан инсанлардан башкъаларны сакъындырмакъ керекмиз.

Урьметли мусульманлар!
Сизинъ тевсиелеринъиз инсанларгъа тесирли олмасы ичюн, тевсиелерни йымшакъ, незакетли шекильде бермек керек, бу иште ахлякъсыз ве къаба давраныштан къачынмакъ лязим.

Аллаhу Тааля Къуранда Пейгъамбер Эфендимиз акъкъында шойле буюрды:
فَبِمَا رَحْمَةٍ مِنَ اللهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ
Манасы: «Аллаh санъа мерхаметлик берди, ве Сен (сахабелерге) незакетли ве йымшакъ даврандынъ. Эгер Сен къаба олса эдинъ ве юрегинъ къатты олса эди, олар Сенден узакълашыр эдилер».
Аллаhу Тааля гунахларымызны багъышласын ве Онынъ эмирлерини ерине китирмек ичюн сабыр ве кучь-къувет берсин!

Категория