Перейти к основному содержанию
урф-адетлеримизни унутмайыкъ

 

ЮРЕГИМЕ
 
Танъ атмаздан эвель даим
Кок пек къарара.
Эр шей тонъа. Рузгяр тонъа.
Копек афырмай.
Тек шу дертли юрегимде 
Уюмай яра.
Инълей, сызлай. Лякин боран
Киби къутурмай.
 
Дюньяларгъа даим къапы
Киби ачылгъан
Юречигим! Адым сайын
Сени алдайлар.
Джам парчасы, ярчыкъларнен
Шыплап ашлангъан
''Эйиликлер'' мельэминен 
Сени багълайлар.
 
Эр ким, эр кес, эр шей ичюн
Сенинъ тёрюнъ бош.
Озюнъ меним юмругъымдай,
Лякин кяинат,
Сейярелер, Кябе ёлу
Дие олсун хош
Озюнъе сен къалдырасынъ
Кучюк бир ляат.
 
Къув, кетсинлер олар бунджа
Санъа беджитми?
Бол нефес ал, яма, душман
Йырткъан перденъни.
Тамирле сен янгъан копюр,
Йыкъыкъы кечитни,
Тюмен-тюмен тиз уджейре
Аскер-фердинъни.
 
Ишанч иман кельпедени
Иле токътамай.
Чыкъар, санъа дост ве заман
Къакъкъан мыхларны.
Сёнген атеш, боджечикке,
Чёпке окъталмай
Котер де ат мильон-мильон
''Ах!'' ве ''вах''ларны.
 
Гульчемберли тузакъларгъа
Тюшме, алданма,
Ялан дюнья - ойнакъ сагъын,
Гуллю бир сахра.
Акъраны ёкъ улькен денъиз
Киби чалкъан сен,
Севги, къудрет, джумертликни
Эйле бир михрап.
 
YÜREGİME
 
Tañ atmazdan evel daim
Kök pek qarara.
Er şey toña. Ruzgâr toña.
Köpek afırmay.
Tek şu dertli yüregimde 
Uyumay yara.
İñley, sızlay. Lâkin boran
Kibi quturmay.
 
Dünyalarğa daim qapı
Kibi açılğan
Yüreçigim! Adım sayın
Seni aldaylar.
Cam parçası, yarçıqlarnen
Şıplap aşlanğan
''Eyilikler'' meleminen 
Seni bağlaylar.
 
Er kim, er kes, er şey içün
Seniñ törüñ boş.
Özüñ menim yumruğımday,
Lâkin kâinat,
Seyyareler, Kâbe yolu
Diye olsun hoş
Özüñe sen qaldırasıñ
Küçük bir lâat.
 
Quv, ketsinler olar bunca
Saña becitmi?
Bol nefes al, yama, duşman
Yırtqan perdeñni.
Tamirle sen yanğan köpür,
Yıqıqı keçitni,
Tümen-tümen tiz üceyre
Asker-ferdiñni.
 
İşanç iman kelpedeni
İle toqtamay.
Çıqar, saña dost ve zaman
Qaqqan mıhlarnı.
Söngen ateş, böceçikke,
Çöpke oqtalmay
Köter de at milyon-milyon
''Ah!'' ve ''vah''larnı.
 
Gülçemberli tuzaqlarğa
Tüşme, aldanma,
Yalan dünya - oynaq sağın,
Güllü bir sahra.
Aqranı yoq ülken deñiz
Kibi çalqan sen,
Sevgi, qudret, cümertlikni
Eyle bir mihrap.
 
14.11.1998

Категория

Источник
http://anaurt.com