Перейти к основному содержанию
урф-адетлеримизни унутмайыкъ

 

Украинада хызмет косьтерген артист, "Къырым" адына къырымтатар фольклор ансамблинде артист – вокалджы
      
     Зарема ханым Меметова озюнинъ иджадий фаалиетини, 1969 сенеси, Озьбек девлет филормониясы янындаки къырымтатар оюн ве йыр "Хайтарма" ансамблинде башлады. 1993 сенеден итибарен, "Зарема ханым" сахнасы адына Къырым эстрада театросында артист – вокалджы. Къырымтатар медениет мирасынынъ янъыдан джанланувында ве сакъланылып къалувында къошкъан иссеси эм де юксек профессиональ иджраджылыгъы ичюн къырымтатар йырджысы Зарема Меметовагъа, 1993 сенеси "Украинада хызмет косьтерген артист"  деген фахрий унваны берильди. 
     Зарема ханым Меметова 2006 сенеден итибарен, "Къырым" адына къырымтатар фольклор ансамблинде артист – вокалджы чалыша. Сонъ дередже вокал къабилиети, юксек иджраджылыкъ меарети, Къырым миллий фольклорыны теренден билюви – буларнынъ эписи, йырджынынъ, ялынъыз озюне хас  иджазий хусусиетидир. Йырджынынъ юксек профессиональ усталыгъы, теджрибеси, сейирджилер – динълейиджалер иле оладжакъ эр бир корюшювге усанмадан азырлыкъ корюви эснасында онынъ бутюн чыкъышлары  мувафакъиетли кече.
     Шуны да сёйлеп кечмели ки, буюк иджадий къабилиетке малик олгъан Зарема ханым, ансамбльнинъ иджадий осювине чокъ эмек къоя. О, коллективнинъ бедий эйети азасы оларакъ, янъы программа репертуарыны сечювде актив иштирак эте. Айны заманда "Йырлар хазинеси" денильген соло программасыны азырлады.
     Зарема ханым Меметованынъ усанмадан,  иджадкъа ве омюрге себатлылыкъле янашувы, севимли ишине нисбетен садакъатлыгъы саесинде о меслекдешлери арасында даима урьмет ве миннетдарлыкъ къазанып кельмекте.
 
Ukrainada hızmet köstergen artist, "Qırım" adına qırımtatar folklor ansamblinde artist – vokalcı
      
     Zarema hanım Memetova özüniñ icadiy faaliyetini, 1969 senesi, Özbek devlet filormoniyası yanındaki qırımtatar oyun ve yır "Haytarma" ansamblinde başladı. 1993 seneden itibaren, "Zarema hanım" sahnası adına Qırım estrada teatrosında artist – vokalcı. Qırımtatar medeniyet mirasınıñ yañıdan canlanuvında ve saqlanılıp qaluvında qoşqan issesi em de yüksek professional icracılığı içün qırımtatar yırcısı Zarema Memetovağa, 1993 senesi "Ukrainada hızmet köstergen artist"  degen fahriy unvanı berildi. 
     Zarema hanım Memetova 2006 seneden itibaren, "Qırım" adına qırımtatar folklor ansamblinde artist – vokalcı çalışa. Soñ derece vokal qabiliyeti, yüksek icracılıq meareti, Qırım milliy folklorını terenden bilüvi – bularnıñ episi, yırcınıñ, yalıñız özüne has  icaziy hususiyetidir. Yırcınıñ yüksek professional ustalığı, tecribesi, seyirciler – diñleyicaler ile olacaq er bir körüşüvge usanmadan azırlıq körüvi esnasında onıñ bütün çıqışları  muvafaqiyetli keçe.
     Şunı da söylep keçmeli ki, büyük icadiy qabiliyetke malik olğan Zarema hanım, ansamblniñ icadiy ösüvine çoq emek qoya. O, kollektivniñ bediy eyyeti azası olaraq, yañı programma repertuarını seçüvde aktiv iştirak ete. Aynı zamanda "Yırlar hazinesi" denilgen solo programmasını azırladı.
     Zarema hanım Memetovanıñ usanmadan,  icadqa ve ömürge sebatlılıqle yanaşuvı, sevimli işine nisbeten sadaqatlığı sayesinde o meslekdeşleri arasında daima ürmet ve minnetdarlıq qazanıp kelmekte.
 
 
Enver Izmailov and Zarema Hanim
 
Zarema Hanum - Ural Dagi
Источник
http://qirim.com.ua/pages/item/zarema-hanym-memetova