Перейти к основному содержанию
урф-адетлеримизни унутмайыкъ

الْحَمْدُ ِللهِ رَبِّ الْعَالَمِينَ وَالصَّلاَةُ وَالسَّلاَمُ عَلَى نَبِيِّهِ الْكَرِيمِ وَعَلَى ءَالِهِ وَأَصْحَابِهِ الطَّيِّبِينَ الطَّاهِرِينَ، عِبَادَ اللهِ أُوصِيكُمْ وَنَفْسِيَ بِتَقْوَى اللهِ الْعَظِيمِ وَالْعَمَلِ بِالشَّرْعِ الْقَوِيمِ
Мухтерем мусульманлар!
Билинъиз ки, Аллаh къулларына файдалы олгъан шейлерини элял япты, эм дюньяда, эм де Ахиретте оларнынъ менфааты (польза) ичюн. Аллаh Шариатта харам эткен шейлерден бизге узакъ олмагъа эмир этти. Оларнынъ арасында зина япмакътыр ве бу энъ буюк гуняхлардан биридир.
Зинанынъ джемааткъа буюк зарары бар: несильнинъ гъайып олмасы, инсанлар арасында фитненинъ ве яланнынъ даркъалмасы, ялан шаатлыкъ япылмасы себебидир. Бир чокъ инсан бу белягъа огърадылар, яни зинагъа тюшти. Фаишелик чокълашты, эгленемиз ве дюнья лезетини аламыз деп, озьлерине ве джемааткъа не къадар зарар келе ве олар ич хатырламадан гъафлет ичинде булуналар.
Мусульман къардашларым, элял ве харам беллидир. Аллаh Къур’анда буюра: Манасы: «Аллаhкъа ортакъ къошмагъанлар, ве нефисини акъсыз оларакъ ольдюрмегенлер, ве зина япмагъанлар эр ким бу гуняхлардан къорунмазса олар гуняхкярлардыр.» Бу Аеттен анълашыла ки, зина япмакъ харамдыр. Ким элял десе, бу куфрдыр (имансызлыкъ), чюнки Къур’ан-и Керимге къаршыдыр. Айны шекильде ябанджы къадынгъа тиймек я да опьмек – харамдыр.
Пейгъамбер Мухаммад ‘алейhиссалям деди: «Козьнинъ зинасы харамгъа бакъмакътыр, къулакънынъ – харамларны динълемектир, элининъ гуняхы – акъсыз оларакъ бир кимсени урмакътыр. Бундан анълашыла ки, инсангъа кенди азаларыны буюк ве кучюк гуняхлардан къорумакъ фарздыр. Бир кимсе кучюк гуняхлардан къорунса, буюк гуняхлардан къорунмагъа онъа къолай олур. Бир кимсе гунях япкъан вакъыт, санки ич бир шей олмады киби, видждан азабы чекмесе ве тёвбе этмесе, гуняхтыр. Зина япкъан кимсе, Къыямет кунюнде Аллаh азабыны чекер, анджакъ тёвбе этип ольсе, Аллаh афу этиджидир. Элялны къалдырып, харам леззетине алдангъанлар эм бу, эм де о бир дюньяны гъайып этерлер. Харамларны ташлап, элял япмагъа фарздыр.»
Пейгъамбер Мухаммад ‘алейhиссалям айтты: «Кучьлю иман саиби олгъан мусульман зина япмаз, амма фасикъ (чокъ гуняхкяр) япар. Аллаh бизге джынсий азаларыны зинадан къорумагъа эмир этти.»
Аллаh буюрды: «Джынсий азаларыны харамдан къоругъанлар, бу тек озь апайынен элял илишкилерде булунгъанлар. Аллаh бизге элял ве харам ёлларыны бильдирди.»
Пейгъамбер Мухаммад ‘алейhиссалям деди: «Биринъизде эвленмеге ихтияджы олса, эвленсин. Чюнки бу онынъ козьлерини ве джынсий азаларыны харамдан къорчалар. Амма ким эвленип оламаса, ораза тутсын, чюнки бу къуртулыштыр.»
Пейгъамбер Мухаммад ‘алейhиссалям деди: «Аллаh еди чешит инсанларны Къыямет кунюнде Аль–Аршнынъ кольгесинде кольгелендиреджек, буларнынъ бириси – бир гузель къыз зинагъа давет эткен заман, мен Аллаhтан къоркъам, зина япмайджам деп ондан узакълашкъанлар.»
Мухаммад ‘алейhиссалям Хадисте бойле буюрды: «Ким озюнинъ апайынен джынсий мунасебетте булунса (зевкъланса биле) севап олур, ким ябанджы къадыннен джынсий мунасебетте булунса, гунях къазана.» Имам Муслим ривает этти.
Эгер мусульман озюнинъ джынсий азаларыны гуняхтан къорчаласа, о Дженнетнинъ ортасында Аль–Фирдаус деген ерге киреджек.

Категория

Источник
http://anaurt.com