Перейти к основному содержанию
урф-адетлеримизни унутмайыкъ

Мемет Нузет

КЪАРТ КЪЫЗНЫНЪ ТЮШЮНДЖЕЛЕРИ
Сайлагъан назгъа, наз тазгъа,
я балчыкъкъа, я сазгъа.
Аталар сёзю.

20 ЯШЫНДА
Бай болмаса, яш болмаса, эм де дюльбер болмаса, 
Озю де бир интеллигент, юзю кулер болмаса,
Эр расткельген йигитчикке мен «къоджам» деп отурмам,
Ондай эткен акъайларнен ич бир вакъыт эв къурмам.

Абдурешит яхшы амма, эм окъугъан, эм дюльбер,
Лякин онда зенгинлик ёкъ, олсын даа пек чебер.
Дюльбер деп де, мен оларгъа хызметкярлыкъ эталмам,
Ялнъыз онынъ бильгисичюн эвни ташлапи кеталмам.

Ибадулла зенгин амма, озю джаиль бир чобан.
Байла оны бир арангъа, къой алдына ем, тобан.
Якъуб, десенъ, эм окъугъан, эв-баркъы да зарарсыз,
Лякин, гъарип, бойдан алчакъ, беттен чиркин къарарсыз. 

Мустафада окъув да бар, гузеллик де, мал да бар,
Лякин яшы отуз олгъан, ол бакъайым онъа яр:

25 ЯШЫНДА
Акъай деген акъай шимди бай болмаса да ярар.
Озю дюльбер, окъур-язар, эм де яшы бир къарар. 
Абдурешит яхшы эди, ах, мен оны къачырдым. 
Къапты оны явур Эсма, мен бульбульни учурдым.

30 ЯШЫНДА
Акъайнынъ пек яшы не мот, аз къартлыкътан не зарар?
Тек окъувы, акъылы олсун, корьмеси де бир къарар.
Мустафада козюм къалды, уйленди о бу сене.
Мен гъарипте бахыт бармы? Къуру къалдым мен кене.

35 ЯШЫНДА
Акъайларгъа чиркинлик де буюк къусур сайылмаз,
Илими, акъылы болгъандан сонъ, онда эрлик джоюлмаз.
Якъуб тамам къарар эди, мен, акъылсыз, бильмедим.
Къысмет олды Сабриеге, мен кене де кульмедим.

40 ЯШЫНДА
Пек разыман бир акъайгъа, сайламайман мен дюльбер, 
Не бай, не яш, не тюкянджы, не языджы, не бербер.
Тек бир эркек ады болса, мен, гъарипке, боладжакъ, 
Амет, Мемет, ким болса да, эксиклигим толаджакъ. 

Безенемен, тюзенемен, пудра, боя джагъаман,
Сонъ модаман кийинемен, сыргъа, юзюк тагъаман. 
Подворлы, тар аякъкъаплар, кофта, юбка кийсем де,
Кимсе манъа козюн къысмай, озюм янып кюйсем де.

Категория

Источник
http://anaurt.com