Перейти к основному содержанию
урф-адетлеримизни унутмайыкъ
2014 senesi, iyün 20-de Bağçasarayda yerleşken, Şarqiy Avropanıñ eñ eski medresesi sayılğan Zıncırlı medresede "Qırım camileri: Özbek han camisiniñ 700 yıllığına" serlevhalı fotosergi açıldı. Bu yerde XX asırnıñ 20-nci seneleri Eski Qırımda teşkil etilgen qazıntılar neticesinde elde etilgen arheologik nesnelerniñ tahminen 100 unikal fotosı taqdim etildi. O vaqıt qazıntılarğa professor İlya Nikolayeviç Borozdin (1883-1959) rehberlik etken edi. Bunıñ neticesinde Özbek han camisi külliyesiniñ medrese ve mezarlığınen bağlı bir çoq arheologik malümatlar belli oldı.
Sergide taqdim etilgen Qırım camileri fotoresimleriniñ çoqusı Bağçasaray tarihiy-medeniy qoruğı ve Rusiye ilimler akademiyasınıñ arhivlerinden keldi.
Serginiñ açılış merasiminde Bağçasaray rayon devlet memuriyetiniñ reisi İlmiy Ümerov, Bağçasaray rayon şurası reisiniñ muavini Zamir Haybullayev, Bağçasaray bölgesiniñ baş imamı Ramazan Asanov, icadiy tögereklerniñ temsilcileri ve Bağçasaray qoruğınıñ hadimleri iştirak ettiler.
Bağçasaray tarihiy-medeniy qoruğınıñ ilmiy iş boyunca müdir muavini İlya Zaytsevniñ qayd etkenine köre, taqdim etilgen fotoresimlerinden belli ola ki, qırımtatarlar qurğan yarımadadaki orta asır diniy abideleriniñ çoqusı bugünki künge qadar saqlanıp qalmadı, saqlanıp kalğan camiler ise, ibadet yerleri olaraq qullanılmay. İlya Zaytsev işbu sergi Qırım tamır halqına ait diniy binalar meselesinde adaletniñ tiklenecegine ümüt etkenini bildirdi.
Sergideki er bir fotoresim diqqatqa lâyıqtır ve ayrı tedqik etilüvini talap ete. Sergi müellifleri Qırım camilerine ait arhiv malümatlarınıñ keñiş katalogını yapmaq niyetindeler. Bunıñ içün Rusiye, şu cümleden, Sankt-Peterburg arhivleri qullanılacaq.
"Qırım camileri: Özbek han camisiniñ 700 yıllığına" fotosergisi Bağçasaray tarihiy-medeniy qoruğı, Rusiye ilimler akademiyası (Moskva), "Marcani" fondı (Moskva) ve Bütünrusiye ecnebiy edebiyat devlet kitaphanesiniñ (Moskva) beraber azırlağanları bir leyihadır.
Sergi bütün yaz devamında Zıncırlı medresede olacaqtır. Oktâbr ayında ise, sergi Moskva şeerindeki Bütünrusiye ecnebiy edebiyat devlet kitaphanesinde taqdim etilecek. O vaqıt devlet kitaphanesinde 3-ünci "İslam alemi" halqara konferentsâsı keçirilecek.
Belli olğanı kibi, 2014 senesi Özbek han camisiniñ 700 yıllığı qayd etile. İşbu cami 1314 senesi Solhat, yani Eski Qırım şeerinde quruldı. 2014 senesi, küzde, caminiñ 700 yıllığına bağışlanğan bir sıra merasimlerniñ keçirilmesi közde tutula.
 
QMDİ matbuat hızmeti

Категория

Источник
QMDİ matbuat hızmeti