Аййа, аййа, аййасы,
Не заман тиер файдасы.
Къыш тиймесе, яз тиер,
Ашыкъмасын анасы.
Эвель-эзельден, аналар балачыкъларына бойле айненилер йырлап, якъын келеджекте олардан ярдым корьмек умютлерини беслей эдилер. Эр бир ана эвлятлары ишкир, ярдымсевер инсанлар оларакъ осип етишмесини истер эди. Иште, балагъа эмекке урьмет ве севги ашламакъ ичюн, ана-бабаларнынъ элинден нелер келир, аджеба?
Энъ эвеля, шуны хатырлатмакъ керекмиз ки, ярдымгъа азыр ве чалышмакътан чекинмеген бала муаббетлик, севги, достлукъ, мусбет муит укюм сюрген къорантада етише биле. Мерхаметли бала ярдым этмеге де тездже огренир.
Демек, ярдым этмекни балагъа не вакъыттан башлап огретмек керекмиз? Не къадар эрте башласакъ, о къадар яхшы. Бу ерде энъ кичик балаларымызгъа биле белли дереджеде сербестлик, мустакъилликни темин этмелимиз. 1 яшында бала энди анасыны такълит этип, чулнен тозларны сильмеге башлай, савутларны да ягъбезнен сюртмеге ынтыла. Баланынъ бу гъайретлерине кедер этмемели, аксине, баланынъ эмекке эр бир тешеббюсини дестеклемели. Эвлядынъыз софраны джыйыштырувда сизге ярдым этмеге ынтылып, бир къач фильджанны къырса биле, я да онынъ темизлик япмакъ гъайретинден сонъ, эр шейни янъыдан ювмагъа меджбур олсанъыз биле, ишкир эвлядынъызны макътап, охшав ве севгинъизнен айрыджа мукяфатландырмалысынъыз. Асылында, эсас макъсат баланы 1 яшындан савут ювмагъа, я да аш пиширмеге огретмек дегиль де, яшлыкътан эмекке севги ашламакътыр, озюни бакъа бильмек, келеджек аятында беджерекли олмакъ мааретлерине саип этмектир.
Балагъа, яшына ве имкянларына коре, енгиль вазифелер бермек мумкюн. 3 яшында бала мемнюниетнен чечеклерни суварыр, эвде темизлик япмагъа, аш пиширмеге, айрыджа да, хамурдан лезетли ашлар пиширмеге ярдым этер. Кичик ярдымджынъыз вазифенъизни бирден беджерип оламаса, оны тазирлемек ерине, сабырнен эр шейни анълатмалы, косьтермели, ишине бираз ярдым этмели ве, сонъунда да, мытлакъа бала эмегининъ нетиджелерини нумайиш этмели. Бойле этип, бала онынъ гъайретлери бошуна кетмегенини анълар ве, илериде де, арекетлерининъ нетиджесинде меракъ корип, ишке тутуныр. Амма бу ерде шуны да мытлакъа къайд этмелимиз ки, эв ишлерининъ яптырылмасыны джеза оларакъ къулланмакъ олмаз. Зорбалыкънен япылгъан иштен бала мемнюн олмаз, хошланмаз ве кет-кете ярдым этмектен чекинир.
Мезкюр мевзумыз баягъы меракълы ве эмиетли олгъаныны себебинден, оны келеджек санларымызда девам этмек ниетиндемиз.
