ЯНЫКЪ КЪАВАЛ
Бир ирмакъ болуп да, сынджырсам кольге,
Я бир коль болсам да, серильсем чёльге!..
Бир джюке болайым къаялар ичинде,
Чевирсин кевдемни къарувлы селлер,
Къаядан къаягъа шыпырсын еллер,
Йылдырым ишлесин яш фидан экенде…
Кичкене саваплар, кичкене эмгеклер,
Кичкене гунахлар язмасын мелеклер!..
Ольмектен къоркъаман гъафиллер кибик,
Олийим тавларда аслымда кийик!..
Бир олю болайым мезарсыз, ташсыз,
Къадимсиз, зикирсиз, яланджы козьяшсыз!..
Тиймесин тениме титреген эллер!..
«Ольди!» демесин тувмай ольгенлер!..
«Кирли!» деп ювманъыз, ольгенлер темиздир,
Ольгенлер къайгъысыз, къоркъусыз, тегиздир.
Ешиллик ерлерде, сельбилер тюбюнде,
Комюльсин бир даа яшамакъ тилеген!
Дженнетке кирмекчюн саваб ишлеген,
Кимнинъ ки китабы, анахтар джебинде!..
Яшавдан къоркъмагъан, олюмден урькмеген,
Яшавчюн тиленип тюз ёлда юрмеген,
Эр вакъыт тырмашкъан, терлеген эрлер,
Дженнетке кирселер, дестурсыз кирерлер!..
Источник
http://anaurt.com
