Исмаил Акъкъи (1876-1938)

Исмаил Ариф Мемет огълу Акъкъий оджа 1876 сенеси Багъчасарай шеэринде дюньягъа келе. О, Багъчасарайдаки дюньяджа намлы Зынджырлы медресесини битирген сонъ Стамбулда окъуп кельген Хатидже Ибраим къызына эвлене. Онынънен берабер Ялта янындаки Дерекойге кочип келе ве шу ерде оджалыкъ этип башлай.

 

И. Акъкъийнинъ оджалыкъ эткен мектеби, заманына коре, илери кеткен мектеплерден бири эди. Дерекой мектеп балаларына дин дерсинен бир сырада фен дерслерини де (джогърафия, тарих, табиат, эсап) окъутыр эди.

 

Исмаил Акъкъий оджа Дерекой мектебинде 40 йылгъа якъын оджалыкъ япты ве озь ишинен, озь фаалиетинен шу кой джемаатында буюк итибар къазанды. О, оджалыкъ ишинен бир сырада, джемаатнынъ бутюн ишлерине къошулып, озюни фааль бир джемаатчы оларакъ косьтерди.

 

Дженктен эвель Исмаил оджа Къырымда отькерильген бутюн тиль конференцияларында иштирак этти, анда тиль меселелери боюнджа чыкъышларда булунды. О, халкъымызнынъ намлы эрбаплары Али Боданинский, Халиль Чапчахчы, Селим Меметов ве дигерлеринен бир сырада, Н.Челеби-Джихан ве Джафер Сейдамет ёлбашчылыгъында кечирильген биринджи къырымтатар миллий Къурултайынынъ делегаты ола. Къурултайгъа о Ялта районындан сайлана.

 

1917 сенеси апрель 1-де Мусульман Иджра комитетининъ биринджи топлашувы ола. Бу топлашувда бир сыра меселелер бакъыла, джумледен, И. Акъкъийге Акъмесджит шеэринде Мусульман иджра комитети тарафындан тешкилятландырылгъан оджалар курсларыны алып бармакъ авале этиле. Бу курсларда Исмаил оджа къырымтатар тилининъ методикасыны алып барды. Сонъундан бу методика эсасында арап элифбесининъ саделештирильген усулынен къырымтатар мектеплери ичюн дерсликлер чыкъарылды.

 

1917 сенесининъ ноябрь айындан Исмаил оджа Дерекойге къайта ве кой мектебинде 1937 сенесине къадар чалыша. Исмаил Акъкъий Ялтадаки шаркъ музейининъ директоры Якъуп Кемал, белли артист Хайри Эмир-заде, Ягъя Наджип Байбуртлы, Осман Акъчокъракълы, Асан Чергеев, Шамиль Токътаргъазы, Мемет Нузет, Ариф оджа Гъаниевлернен якъын дост олып, сыкъы алякъада булуныр эди.

 

Исмаил оджа эдебиятны пек севе ве арада-сырада озю де кучюк-кучюк шиирчиклер яза тургъан. И.Акъкъий оджа дигер намлы эрбапларымыз сырасында Сталин репрессиясынынъ къурбаны олды. 1937 сенеси халкъ душманы баанеси иле къапатылып, КГБнинъ невбеттеки къурбанларындан бири оларакъ, шу джеллятларнынъ элинден шеит кетти. 1938 сенеси октябрь 7-де къуршунгъа тутула.

 

Исмаил Акъкъий оджанынъ омрю ве фаалиети шуны косьтере ки, о озь деврининъ терен бильгили, акъыллы, тешеббюсчи адамы, миллетимизнинъ медениетини котерювде ёрулмакъ бильмей хызмет эткен федакярларымыздан бири эди.

 

*  *   *  *  *

 

Исмаил Акки родился в 1876 году в городе Бахчисарае. Закончил Зынджырлы медресе, затем начал преподавать в деревне Дерекой, в пригороде Ялты. Дерекойская школа была одной из прогрессивных школ своего времени. Кроме религиозных предметов, в школе преподавали географию, историю, природу и математику.

 

Исмаил Акки более 40 лет проработал в школе и заслужил глубокое уважение сельских жителей. Принимал участие и выступал  с докладом на Всекрымской научной конференции по языку. Был избран делегатом I национального Курултая от Ялтинского района, и был связан с выдающимися общественными деятелями, такими как Али Боданинский, Халиль Чапчахчи, Селим Меметов, Н. Челеби-Джихан, Джафер Сейдамет.

 

1 апреля 1917 г. состоялось собрание I Мусульманского Исполнительного комитета, на котором Исмаилу Акки было предложено организовать курсы для учителей. На этих курсах Исмаил Акки читал курс лекций по методике преподавания крымскотатарского языка. Позднее на основании этой методики был подготовлен и выпущен учебник с системой облегченного метода изучения крымскотатарского языка в школах на основе арабской графики.

 

Исмаил Акки стал жертвой сталинских репрессий 1937 года. В 1938 году был расстрелян.

 

И. Акъкъи акъкъында (О жизни и деятельности И. Акки):

 

1.       Ойсинкойлю С. Теджрибе несильден несильге кече: Исмаил оджа Акъкъий 125 яшында // Къырым. – 2001. – Дек. 14.

 

2.       Темиркъая Ю. Халкъ оджасы: Маарифимиз тарихындан: [Исмаил Акъкъий оджа акъкъында] // Йылдыз. – 1993. – № 4. – С. 198-207.

 

3.       Акъкъи Д. О ресимде бабам да бар: [И.Акъкъийнинъ къызынынъ хатырлавлары] // Янъы дюнья. – 1991. – Янв. 23.