İsmail Gasprinskiy 
AMAN OĞLUM 
Aman, oğlum, satma saqın, eliñdeki toprağı, 
Anañ kibi seni besler bereketli quçağı. 
Piçen, arpa, aş istemez, verir saña bunları, 
Sefil rezil olma saqın, satıp ana toprağı. 
Yedikleriñ, içtikleriñ ep bu topraqtan kele, 
Cebiñdeki aqçaları saña bu topraq vere, 
Alma, armut, arpa boğday, bağ ve bostan cümlesi – 
Toprağıñ verdigi baylıq... Satma saqın, toprağı. 
Onı bilip, sevmelisiñ çayır ile bağçayı, 
Aqça suvdır aqar gider, bitirirsiñ aqçayı. 
Bağça gitti, aqça bitti, ne olur seniñ alıñ? 
Aman oğlum, topla aqça, keri qaytar bağçayı. 
Baq, seniñ bir çayırıñ bar... Ne guzeldir çoqrağı, 
Şırıl-şırıl kele suvu, yarıp qara toprağı. 
Lânet eder saña çoqraq, satma saqın çayırı, 
Eger satsañ, çevirirsiñ fenaya sen hayırı. 
Saç tarlaya arpa, boğday, işle, bekle tarlayı, 
Bir saçarsıñ – on alırsıñ, unutmayıp Hudayı, 
Bir çuval boğdaya qarşı, altın kümüş verirler, 
Kerekleriñ er ne ise – bunlar ile kelirler. 
Aman oğlum, satma saqın, eliñdeki toprağı, 
Anañ kibi seni besler, bereketli quçağı
Piçen, arpa, aş istemez, verir saña bunları, 
Sefil rezil olma saqın, satıp ana toprağı.
Источник
https://ana-yurt.com