Рефат Чайлакъ. БААРЬ КЕЛЬСЕ...

БААРЬ КЕЛЬСЕ...

Эвден чыкъсам, ягъмур токътагъан, 

Денъиздайын кок юзю мавы.

Ешиль отны кимдир таптагъан, 

Гуль багьчасы темиз авалы.

Юрегиме дерман бу ава,

Кунеш куле, къокъуй мелевше. 

Ана ерчюн ягъмур бедава, 

Къарылгъачлар меннен сёйлеше.

Къора бою наргузлер ачкъан 

Гузелликнен джоша саарьлер. 

Эрте баарь, кунеш нур сачкъан, 

Ах, бу севги! Ах, бу баарьлер!

Юрегимде магърур дуйгъулар 

Баарь кельсе, сельдай акъалар. 

Ах о, назик, баллы дудакълар, 

Юрегимни отсыз якъалар!