ШЕВКЪИЙ БЕКТОРЕ ЙЫЛДЫЗ 1991 №3
ТАТАРЛЫГЪЫМ
 
 
Татарлыгъым, тувгъан ерим,
Балалыкътан суемен.
Онлар ичюн коп вакъытлар
Джылай-джана куемен.
Къайда барсам, мен коремен,
Гъарип татар сачылгъан.
Озь багъында къокъламагъа
Ёкъ бир гулю ачылгъан.
Къальтеджексинъ, озь багъындан,
Озь тилинден пек гъарип.
Лякин кимге айтаджакъсынъ
Сен буларны тиль джарып.
Къатты джельмен атылгъанлар
Тавгъа, ташкъа я джаргъа.
Джарты дюнья мезар болгъан
Татарлыкъкъа, татаргъа.
Эр мезарнынъ баш уджунда
Токътап тёктим козь яшым.
Эр бирине чынъларымдан
Ясап тиктим баш ташын.
Къол котерип дуа эттим
Юрегимден худайгъа.
Узун, къутлы омюр берсин
Бары оксюз анайгъа!
(1913 с.)
Источник
http://anaurt.com