БАСТЫРЫКЪ
Дёрт таш дивар, энъ тёпеде – бир кичкене пенджере,
Ичке демир чабакълардан ышыкъ тувул – дерт кире.
Эр кошеде дым кольгелер, ешиль куфьлер копюре,
Ятакъ – тахта, емек – фена, ерден сувукъ уфюре.
Хызметчи де эр кунь бунысувлап-сувлап сюпюре,
Кимерде бир анайны да сёгюп сала, козь коре.
Акъшамлар бу къара уйге къара перделер кере,
Янъгъызлыкълар янъгъыз джангъа джанлы тюшлер косьтере.
Гъарип юрек чапалана, тенлер, тюклер урьпере.
Тозмай гонъюль, аваланып, алчала бом-бош ере.
Невбетчилер гедже-куньдюз къарап, джурип тешкере
Къапыдаки авур кильтни эр саат дёрт-беш кере.
Бу кольгели, къарадан сувукъ кильтли къара мезаргъа
Ясанлардан даа фазла яхшы инсан коп кире.
Киргенден сонъ ишлер белли: тура, тура я джуре,
Я да акъсыз азапларгъа даянамай делире...
Номан Челебиджихан
BASTIRIQ
Dört taş divar, eñ töpede – bir kiçkene pencere,
İçke demir çabaqlardan ışıq tuvul – dert kire.
Er köşede dım kölgeler, yeşil küfler köpüre,
Yataq – tahta, yemek – fena, yerden suvuq üfüre.
Hızmetçi de er kün bunısuvlap-suvlap süpüre,
Kimerde bir anaynı da sögüp sala, köz köre.
Aqşamlar bu qara üyge qara perdeler kere,
Yañğızlıqlar yañğız canğa canlı tüşler köstere.
Ğarip yürek çapalana, tenler, tükler ürpere.
Tozmay göñül, avalanıp, alçala bom-boş yere.
Nevbetçiler gece-kündüz qarap, cürip teşkere
Qapıdaki avur kiltni er saat dört-beş kere.
Bu kölgeli, qaradan suvuq kiltli qara mezarğa
Yasanlardan daa fazla yahşı insan köp kire.
Kirgenden soñ işler belli: tura, tura ya cüre,
Ya da aqsız azaplarğa dayanamay delire...
Noman Çelebicihan
Источник
http://anaurt.com
