Бекир Чобан-Заде. КЪАРТ ЧЕРКЕС

КЪАРТ ЧЕРКЕС

Бир уджуз джашав дердинде эр кес, 

Уджуз бир джашав дердинде эр ким, 

Тюрбелер чёке, мезарлар омрай... 

Не топракъ астында бир эр кевдеси... 

Не топракъ устюнде бир джигит сеси...

 

Ингилиз чубугъын савура кокке, 

Ингилиз байрагьы саллана юксек,  

Медресе, джамининъ къапусы къырыкъ... 

Тюрбелер таш болгъан, эвлия — сюек, 

Тюрбелер таш болгьан, эвлия — сюек...

 

«Манънайгъа язылгьан башкъа да келир», — 

Эсирлер тюркюси мырылдай эр кес, 

Тек бир къарт къолунда бар эски къувет, 

Джетмишлик, Шамильдий къараман Черкес. 

Джетмишлик, Шамильдий къараман Черкес...

 

Бир кяфир баласы, къоркъута эпсин, 

Черкесте лякин бар эски бир иман, 

Джетмишлик ихтияр акъ сёзни кутий: 

Он кяфир дженъер бир джигит муслюман, 

Он кяфир дженъер бир джигит муслюман...

 

Къарт Черкес ольди. Шамильдже олюм... 

Мевтасы толтырыр эренлер мезарын. 

Акъ сачын устюне тамлагъан къанлар 

Ислямгъа чыза бир умютли ярын, 

Ислямгьа чыза бир умютли ярын...

 

Бекир, сен Черкесни анълагъан болсанъ, 

Хатунлар ишидир — такъмакъны ташла; 

Сен Гирай къулысынъ, башынъны ал да, 

Шамильдже бир олюм излерге башла... 

Сен де шай бир олюм излерге башла...