«ТАТАР ТЮГЮЛЬМЕН!..» ДЕГЕНЛЕРГЕ
Сюнълюн джылынынъ дёрдюнджи айында,
Маджарлар элининъ бир къызгъын джайында...
Джетишти Баты хан къарт Дунай боюна...
Хаберлер джиберди явурлар союна...
«Хаберсиз кельдилер, деме сонъ душман,
Атынъны эгерле, яйынъны къушан!..»
Явурлар, динлери татардан айры:
Фарангы, германы, о муртед маджары...
Беклетмий джетишти, кулюшип, ойнап,
Джолларда тоснакълар, ильчилер къайнап...
Хачларын такътылар опип моюнгьа,
Кёр, топал эренлер эп кельди джыйынгъа...
«Барбарлар, буларнынъ согъушы оюн...
Дин, бильги къолыман къырайыкъ союн...»
Дий эди Явропа, бу явур оппа...
Татардан корьмеген бир яхшы сопа...
Татарлар турдылар чынларын джырлап,
Яйларын, атларын алтунман сырлап...
Бир согьуш болды шай... Ах, Аджем корьсе!..
Фирдевсий булардан бир дестан орьсе!..
Он кере салдырды джавур шай гурьлеп,
Он кере къаныман джерлерни кирлеп...
Ой, татар баллары бар эди дженкте,
Буларнынъ торуны Дженгиз де, Ленг де...
Тютме-тют болды ай, байракълар къолда,
Къорайлар тоз болды, сель акъты джолда...
Ай, урды джигитлер нарасыз, сессиз...
Бир куньде джыгъылды Явропа эссиз...
Етмиш бир миллети бойнуны эгди...
«Аменна!» дедилер, Баты хан дженъди...
Баты хан къолунда кемиги, эти...
Явропа о вакъыт «Татарман!» дий эди...
О акъшам бир дюгюн ясады татар,
О акъшам керекмий джылдызлар, айлар...
Чын татар булардыр, къайтарма бильген,
Татарджа джырлагъан, олюмге кульген...
Бар татар тек бу гунь джашагъан болса,
Бу гуньчюн тувгъан да ашагьан болса...
Источник
http://anaurt.com
