Кунеш къонгъан заманда.
Балкъурт гульден айрылды,
Къуш къанаткъа сарылды.
Ай уянды семада,
Кунеш къонгъан заманда.
Козь юмгъанлар чечеклер
Тёшек тёшей боджеклер.
Сес-солукъ ёкъ орманда,
Кунеш къонгъан заманда.
Эр ананынъ къойнунда
Сабийлери уйкъуда,
Ай кулюмсей бу аньда,
Кунеш къонгъан заманда.
***
Кокте тылсымлы дюнья.
Кокте тылсымлы дюнья:
Ай – ана, Кунеш – баба,
Балалары – йылдызлар,
Олар огълан эм къызлар.
Бутюн кунь баба – кунеш,
Багъышлай алтын атеш,
Акъшамгъа ёргъун ола,
Бираз гедже дам ала.
.
Кулер юзьлю ярыкъ Ай,
Геджелернен юкъламай,
Кок юзюнде парылдай,
Йылдызларны къорчалай.
Йылдызларгъа Ай – ана,
Охшап масаллар айта.
Бешиклерини саллай,
«Айнени»сини йырлай.
Тылсымлы кокте дюнья:
Ай – ана, Кунеш – баба,
Балалары – йылдызлар,
Олар огълан эм къызлар.
***
Алтын кунеш
Алтын кунеш саарьде,
Нурлы сачларын тарай,
Такъайым, деп баарьде.
Сыргъа-чыкъларын арай.
Сыргъа-чыкъларын такъып,
Котериле кок таба.
Коктен бизлерге бакъып,
Дей бизлерге: –Мерхаба!.
Булутлар кедер этсе,
Оларгъа о дарылмай.
Булутлар агълап кетсе,
Кене кулип парылдай.
