Qırım Muhtar Cumhuriyetinde hizmet köstergen artist, "Qırım" adına qırımtatar folklor ansambliniñ qonuşma janrı artisti
Resul Halilovnıñ emek ve icadiy faaliyeti 1973 senesi Özbekstannıñ Ferğana velâyeti, Marğılan şeeri balalar muzıka mektebinde ocalıq zenaatı ile başlandı. Ocalıq ile beraber Ferğana devlet muzıka oquv yurtunıñ orkestrinde çalıştı, 1975 senesi ise, o, Taşkent şeerinde keçirilgen "Marhabo talantlar" ("Merhaba tadantlar") namında Cumhuriyet televizion festivali laureatı oldı. Ferğana şeerindeki "Tekstilşçik" adına Medeniyet sarayında özbek oyun ve yır folklor ansamblini teşkil etti, 1978 senesi oña "Halq ansambli" namı berildi. Mezkür ansambl Bütünittifaq halq ağız yaratıcılığı laureatı (1979) em de bir sıra Cumhuriyet yarışlarınıñ laureatıdır.
Resul Halilov 1989 senesi, endi Vatanında, Eski Qırımda balalar muzıka mektebinde çalışıp başladı. 1990 senesi, talebelerni beynelmilel (internatsional) ruhta terbiyelev boyunca Bütünqırım ocalar seminariyesini azırlavda ve keçirüvde qoşqan issesi içün oña teşekkür ilân etildi, mektep ve şeer ayatınıñ içtimaiy ömürinde köstergen faaliyeti içün defalarca fahriy yarlıqlar ile taqdirlendi.
Resul Halilov 1991 senesinden itibaren "Qırım" adına Qırımtatar folklor ansambliniñ qonuşma janrı artistidir. Deklamatsiya em de ses mimikasını ve aynı zamanda nutıq qanunlarını temelenden menimsevi sayesinde, daima diñleycilerni özüne celp ete. Areket, quvet, ses yüksekligi, nutıq-ses aralığı (pauza) kibi çeşit ifadeli ses vastalarından faydalanaraq o, artistke has mearetle sözniñ esas darbesini köstere. Onıñ çıqışları aqiqatqa em de medeniy nutıqqa, bugünki künniñ estetik-ğayeviy miarları (kriteriy) qaidelerine cevap bere. Büyük artistniñ er bir çıqışı rejissuranıñ fikirini doğru aks ete, kontsert programmaları içine organik bir şekilde birike, olarnıñ ziynetine çevirile.
Resul Halilov aydın icadiy şahs olmaq ile, o, em acayip şair, em de çalğıcı. Onıñ nazmiyeti, esasen Vatanı Qırımğa, onıñ tarihı ve halqına nisbeten saf sevgini ifadeley. Ukrainada hızmet köstergen sanaat erbabı Server Kakura, Cemil Karikov kibi belli kompozitorlar Resul efendiniñ şiirlerine - sözlerine yırlar yazdılar. Mezkür türküler Ukrainada hızmet köstergen artist Zarema hanım Memetova, Ukrainada hızmet köstergen artist Dilâver Settarov ve diger yırcılar tarafından icra etilip kelinmekte. Şair şimdi özüniñ şirler cıyıntığını çıqarmaq üzerinde iş alıp barmaqta. O, Qırım milliy muzıuasınıñ çeşit janrlarını em de şçekillerini menimseyerek, "Qırım" ansambli erkânındaki orkestr ile birlikte saz, qaval, dare kibi qadimiy halq çalğı aletleriniñ yañıdan canlanmasında salmaqlı isse qoşıp kelmekte. Özü de mezkür aletlerde mearetlikle çala. Doğmuş halqınıñ medeniyet mirasını saqlap qaluv kibi muqaddes işte, onıñ issesi ğayet büyüktir.
Resul Halilov, endi "Qırımtur" yoluna kirgen Eski Qırım şeerindeki Qırım milliy medeniyeti ve yaşayışı etnografiya müzeyiniñ teşkilâtçılarından biridir.
Resul Halilov 2002 senesi, "Qırım Muhtar Cumhuriyetinde hızmet köstergen artist" degen fahriy unvan ile taqdirlendi.
Rus tilinden Yusuf Aliniñ tercimesi
Источник
http://qirim.com.ua/pages/item/resul-halilov
