Шерьян Алиев. Биз чеккен имзалар...

БИЗ ЧЕККЕН ИМЗАЛАР...
Узакъ бир мензильге келип еттик биз,
Тиллер анълашыла, сыджакъ бакъышлар.
Озьбек диярыны мекян эттик биз,
Эллерин узатты бизге къардашлар.
Эвалла, бу халкъкъа сонъки питесин
Бизлернен болюшти, багърыны ачты.
Анъдырып юртунынъ отлы кунешин,
Гонъюльден тюкенмез арарет сачты...
Бу юртны тутмагъан эджель отлары,
Бу ерге етмеген фашист аягъы.
Коксюни дельмеген душман отлары,
Солмагъан гуль ачкъан чименлик, багъы.
Лякин дженк нефеси мында да еткен,
Козьлерни аджыта ренксиз тютюни
Бунда да йигитлер урушкъа кеткен,
Бунда да корьмедик багъры бутюнни!..
Ачлыкъ Азраильдай озюне чеке,
Учкъунлар сачрата дженкнинъ еллери.
Халкъымыз озюни урды эмекке,
Эмегинен кести эджель эллерин!..
Лякин, эй-ат, эй-ат, топракъ да ачмы,
Бинълеп юртдашымны тартты багърына.
Язсам азлыкъ этер дестанлар аджми,
Тек юрек сыгъдыра бойле агърыны...
Ачлыкъ къанат кере адден зияде,
Ярашмай ава, сув язма язмагъа.
Бус-бутюн къоранта кечинди кяде,
Киши тапылмады къабир къазмагъа.
Арыкълар боюнда, тарла четинде,
Обачыкълар пейда олдылар базан.
Олар къабир эди, отьмек дертинде
Азиз юртдашларым берген эди джан!..
Сагъ къалгъанлар да багъланды йипсиз,
Къалъблер бастырылды ындыр ташынен.
Юреклер агълады, агълады инсиз,
Умютнен яшады козъде яшынен.
Комендант дефтерге чектире имза,
Яшы толгъанларны ала эсапкъа.
Къомшу койге барсанъ, азырдыр джезанъ,
Яшагъан еринъде яша чыдасанъ!
Рухсетсиз шеэрге кетмектир ясакъ,
Тутулсанъ, бастырыкъ бараджакъ еринъ.
Магадан тарафлар кенъ ача къучакъ,
Эсири олурсынъ сувукъ Сибирънинъ!
Тувгъанын коръмеге озюндже барып,
Къапкъангъа тюштилер нидже йигит-къыз.
Калыма бетлерде бармы мезары,
Тапылыр экенми олардан бир из?!.
Фашистлер кунь корьди бизим такъдирнен,
Озюмизнинъкилер япты ифтира.
Мезарлыкълар толды тазе къабирнен,
Тюзельмей аля даа о эски яра...
Сиз къол туттунъыз деп, партизанларгъа
Душманнынъ аткъаны етмезми эди?!
Койлерни батырып о ал къанларгъа,
Денъизге къаткъаны етмезми эди?!
Етмезми эр кесни авлап кой-койден,
Агълатып юрьгени юртунъда алман.
Балалар айрылды анадан, сойдан,
Къалдылар ят ильде, дерт чектик яман
Етмезми къызларнынъ кокрегин кесип,
Ханджер саплагъаны, хорлагъанлары?..
Атып-кескенлери коммунист неслин,
Партизан эрлернинъ акъкъан къанлары?!
Мен киби балалар чагъына келип,
Имзалар чекмеге къатнадыкъ эр ай!
Къырылгъан къалъблернен юрьмедик кулип,
Дерсинъ, эр кес бизге душман деп, къарай!..
Шахскъа табынувгъа лянет тамгъасы —
Биз чеккен имзалар турсын силинмей.
Энди акъсызлыкътан къанлар таммасын,
Инсанлар яшасын къалъби тилинмей!