Абдураман Къадри-заде
Abduraman Qadri-zade
1876–1938 2 книги автор
Абдураман Къадри-заде (эдебий лагъабы Чиркий) 1876 сенеси Акъмесджит уездининъ Тавдайыр коюнде, муфти Абдулкерим эфендининъ къорантасында догъды. Башлангъыч мектепте ве Тавдайыр медресесинде окъуды. Бабасындан эрте оксюз къалгъаны ичюн, къардашлары онынъ имаесинде олдылар.
Абдураман Къадри-заде окъувына джиддий янашып, арап, фарс ве рус тиллерини, астрономия ве джогърафияны мукеммель огренди ве сонъундан озю де мезкюр медреседе мудеррис олды.
1920 сенелери «Ени дюнья» газетасында чалышты. Хасталыгъы себебинден, 1930 сенелери иштен чыкъып, 1938 сенеси август 6-да юрек хасталыгъындан вефат этти.
Чокъусы шиирлерини 1920 сенелери язгъандыр. Эсерлери халкъ агъыз яратыджылыгъынынъ боллугъынен айырылып туралар. «Огютчининъ ени огютлери» (1927), «Къарт къызнынъ тюшюнджелери» (1928), «Чыркъ-мыркъмы, мыркъ-чыркъмы?» (1928), Къардашчасына бир огют» (1928), «Юлма, бе яхут!» (1928), «Койлю ве ыргъат» (1929) киби шиирлери мыскъыл ве огют мизаджыны ташыйлар.
Абдураман Къадри-заде къырымтатар эдебиятында терджиман оларакъ да беллидир. О, Э. Золянынъ «Пара» (1930), М. Шолоховнынъ «Акътарылгъан къыртышлар» (1934) киби китапларыны ве дигер бир чокъ языджыларнынъ эсерлерини къырымтатар тилине чевирип, нешир эттирди.
Экинджи джиан дженкинден сонъ, онынъ бир сыра шиирлери «Ленин байрагъы» газетасында (1967), Эшреф Шемьи-заденинъ «Омюр ве яратыджылыкъ» (1974) китабында ве «Иыддыз» (1990, № 6) меджмуасында басылдылар.
Абдураман Къадри-заденинъ базы эльязмалары ве 1897 сенесинден башлап язгъан куньделик дефтери шимдигедже сакъланмакъта.
Абдураман Къадри-заде 1938 сенеси вефат этти.
Источник: З. Къуртнезир, «Къырымтатар эдиплери» (2014), статья №49 Открыть книгу-источник