Перейти к основному содержанию

Джевдет Аметов

Cevdet Ametov

1917–1995 4 книги автор, составитель

Джевдет Аметов 1917 сенеси апрель 14-те Ялта больгесининъ Лимена коюнде догъды. Орта мектепни битирген сонъ, Къырым Девлет педагогика институтынынъ къырымтатар тили ве эдебияты факультетине кире. Лякин, 1941 сенеси, о институтны битиреяткъан вакъытта, экинджи джиан дженки башлай. Битириджилернинъ эписи джебеге ёлланылалар. Дёрт йыл джебеде олгъан сонъ, Джевдет Аметов Озьбекистаннынъ Андиджан шеэрине барып чыкъа, о ерде сюргюнликтеки халкъымызнен берабер иджретте яшай. Анда да маариф ишлеринде чалыша. О, адалетсизликке чыдап оламагъанындан, куньлернинъ биринде оджалар янында Сталинни акъаретлей. Нетиджеде он йылгъа апске алына. Сталин ольген сонъ о бастырыкътан чыкъарыла.

Ана тилимизде «Ленин байрагъы» газетасы чыкъып башлагъанынен, Джевдет Аметовнынъ шиирлери, икяе ве очерклери онынъ саифелеринде сыкъ-сыкъ корюнип башлайлар. О, 1968 сенесинден та Къырымгъа кочип кельгенге къадар, Озьбекистан радиосынынъ къырымтатар тилинде эшиттирювлер муарририетинде чалышты.

Ташкентте языджынынъ «Атеш башында» (1972), «Топлар сускъан сонъ» (1976), «Эрылгъанлар ачкъанда» (1980), «Абдул Тейфыкъ» (1983, Энвер Арифовнен берабер), «Къуршуннен токътатылгъан йыр» (1987) киби бир сыра йкяелер ве повестьлер джыйынтыкълары басылып чыкъты.

Гъайрыдан къурув девири языджынынъ яратыджылыгъына янъы сильтем берди. Онынъ аятынынъ сонъки вакъытларында яраткъан ве вакъытлы матбуат саифелеринде дердж олунгъан «Сёнген оджакълар», «Дагъкесерлер», «Эски достлар душман олды» киби повестьлеринде халкъымызнынъ фаджиалы такъдири ифаде олуна.

Джевдет Аметов экинджи джиан дженкиндеки ярарлыкълары ичюн, бир сыра дженкявер медаллернен такъдирленген эди. О, Языджылар бирлигининъ азасы зди. 1995 сенеси январь 22-де Акъмесджитте вефат этти.

Источник: З. Къуртнезир, «Къырымтатар эдиплери» (2014), статья №126 Открыть книгу-источник

Книги автора

↑