Фетта Аким
Fetta Akim
1911–1959 1 книга автор
Фетта Аким 1911 сенеси Къарасувбазар районынынъ Татар-Аблеш коюнде, фукъаре къорантада догъды. Башлангъыч мектепни койде, орта мектепни Кефеде битире. Сонъунда Акъмесджит оджалар техникумында окъуй.
Эдебиятюьа 1928 сенеси озюнинъ терен маналы шиирлеринен келип кирди. 1929 сенеси «Яш къувет» газетасына месуль кятип оларакъ ишке кире. Белли км, кечкен асырнынъ отузынджы йылларында бу газета яш авескярлар ичюн бир эдебият оджагъы ролюни одей эди. Фетта Аким де бу дергяхта пишкинлеше. Арадан эки йыл кечкен сонъ, 1931 сенеси шаирнинъ «Шиирлер сефери» адлы биринджи джыйынтыгъы басылып чыкъа.
Фетта Аким терен фикрли, кескин тилли, адалетли бир шаир оларакъ шекиллене. Озь иджадында джиддий ве намуслы шаир эди. Онынъ эсерлери бедиийлиги джеэтинден юксек севиели эдилер. Онынъ экинджи «Шиирлер» китабы 1937 сенеси басылып чыкъты.
Сюргюнлик ёллары шаирни Озьбекистаннынъ Бекабад шеэрине алып барды. Анда маден заводында чалышты. Ишнинъ агъырлыгъына бакъмадан, рухтан тюшмеди, иджадий фаалиетини девам эттирди. «Челик ве гуль», «Арманда», «Депутат», «Бир яш кельди», «Ангрен» киби бир сыра шиирлерини язды.
Ташкентте ана тилимизде «Ленин байрагъы» газетасы чыкъып башлагъанынен, теджрибели журналист газетанынъ эдебият ве санат болюгине ишке давет олуна. Мында эйи журналист олувнен берабер, иджаткярлыкъ ишине терен далды. Халкъымызнынъ ишкузар адамлары акъкъында очерклер, шиирлер язды.
1957 сенеси сюргюнликте ана тилимизде нешир этильген ильки китап — «Баарь эзгилери»не Фетта Акимнинъ бир сыра шиирлери, «Еди йыллыкъны яратыджылар» (1959) адлы очерклер джыйынтыгъына «Челик къайнатыджы», «Тенеке ясагъан йигит», «Памукъ устасы», «Девлет Халилов» киби очерклери кирсетильдилер.
1972 сенеси шаирнинъ «Челик ве гуль» шиирий джыйынтыгъы нешир этильди. Фетта Аким Языджылар бирлигининъ азасы эди.
1959 сенеси декабрь 21-де, агъыр хасталыкъ нетиджесинде, Ташкентте вефат этти.
Источник: З. Къуртнезир, «Къырымтатар эдиплери» (2014), статья №109 Открыть книгу-источник
-
Челик ве гуль Фетта Акимавтор 1972 · 41 с.Читать: Челик ве гуль