Наджие Аметова
Naciye Ametova
1959 3 книги автор
Наджие Аметова (Усеинова) Рефат къызы истидатлы, буюк умютлер берген иджаткярлардан биридир. О, эсасен балалар ичюн язгъан икяелери, масаллары ве шиирлеринен беллидир.
Наджие Аметова 1959 сенеси сюргюнликте яни Озьбекистан джумхуриетининъ Сырдарья виляетиндеки «Узбекистан» колхозында Рефат ве Зеврие Аметовларнынъ чокъбалалы къорантасында дюньягъа кельди. Онынъ эки аптеси, бир агъасы ве эки огълан къардашы бар. Оларнынъ эписи алий малюматлылар. Наджие ханым 1976 сенеси Тельман адына 19-ынджы умумтасиль мектебини битирди.1977—1982 сенелери Низамий адына Ташкент девлет педагогика институтыфилология факультетининъ рус ве къырымтатар болюгинде окъуды. Бунынънен берабер, «Ленин байрагъы» газетасы муарриетинде ачылгъан «Кой ве шеэр хаберджилери университети» акъшамлыкъ курсыны битирди.
Институтны битирген сонъ, оны чалышмакъ ичюн «Ленин байрагъы» газетасына ёлладылар. Биринджи сенеси мектюплер болюгинде, сонъра саньат ве совет къуруджылыгъы болюклеринде мухбир оларакъ чалышты.
1989 сенеси «Йылдыз» меджмуасына кечти. О, 1992 сенесине яни меджмуа Къырымгъа авушкъангъа къадар анда уйкен муаррир олып чалышты. 1995 сенесинден Къырымтатар музыкалы-драма театринде къырымтатар тилинден дерс берди. Бунынънен берабер, къырымтатар радиосы балалар ичюн эшиттирювлер программасында икяелеринен сыкъ-сыкъ чыкъышта булунды.1996 сенесининъ экинджи ярысындан исе, «Къырым» сербест ичтимаий-сиясий джумхуриет газетасында санат ве медениет болюгинде чалыша. Газета саифелеринде санат, медениет, маариф, эдебиятны айдынлата, терджимелер япа, балалар ичюн икяе ве шиирлер яза. 2004 сенесинден о «Чокъракъ» балалар саифесини азырлай.
Наджие Аметованынъ биринджи шиири «Балкъуртчыкъ» 1975 сенеси «Ленин байрагъы»нда дердж олунгъан эди. Ондан сонъ онынъ балалар ичюн язгъан шиирлери, икяелери ве масаллары «Ленин байрагъы, «Къырым», «Сувдагъ сеси», «Крымская светлица» газеталарында, Йылдыз» эдебий-бедиий ичтимаий-сиясий, «Арзы» къадын-къызлар ве «Арманчыкъ» балалар меджмуаларында басыла.
Бундан гъайры, Тюркиенинъ Бурса шеэринде чыкъкъан «Kalgay» меджмуасында 2006 сенеси «Шемсие» адлы икяеси, 2009-да шиирлери, «Emeliviz Kirim» меджмуасында языджы Закир Къуртнезирнинъ 70, шаире Джеваире Меджитованынъ 90 йыллыгъы мунасебетинен азырлагъан макъале ве саифеси дердж этильди.
Наджие ханымнынъ язгъан икяе ве шиирлери «Къырымтатар бала эдебияты хрестоматиясы»на, 5—6-нджы сыныфлар ичюн «Турналар» сыныфтан тыш окъув китабына кирсетильдилер.
1982 сенеси Ташкенттеки эдебият ве саньат нешриятында муэллифликте «Къарылгъачлар» шиирлер джыйынтыгъы чыкъты. 2000 сенеси «Дагъда байрам» икяелер ве масаллар китабы, 2010 сенеси исе, «Мелек» шиирлер джыйынтыгъы дердж олунды.
Масаллары, икяелери, шиирлеринде балаларгъа буюклерге урьмет, эмексеверлик, достлукъ киби хусусиетлерни ашламагъа зияде дикъкъат эте.
Наджие Аметова 1976 сенеси Озьбекистанда олып кечкен Яш иджаткярларнынъ джумхуриет семинарында, 2005 сенеси Къырымда олгъан Тюркий халкъларнынъ 6-нджы халкъара шиир фестивалинде, 2009 сенеси исе Тюркиенинъ Сакарья виляети Сапанджа шеэринде олып кечкен Къырымтатар шиириет фестивалинде иштирк этти.
Наджие ханым журналистикада косьтерген хызметлери ичюн 2006 сенеси Къырым Мухтар Джумхуриети Назирлер шурасынынъ «Фахрий ярлыгъы»нен такъдирленди.
Наджие Аметова 2002 сенесинден Украина языджылары миллий бирлигининъ эм де 2004 сенесинден Украина журналистлер бирлигининъ азасыдыр.
Акъмесджит шеэринде яшай.
Источник: З. Къуртнезир, «Къырымтатар эдиплери» (2014), статья №169 Открыть книгу-источник
-
Мелек Наджие Аметоваавтор 2010 · 26 с.Читать: Мелек
-
Сары кунеш Наджие Аметоваавтор 2019 · 224 с.Читать: Сары кунеш
-
Şiirler Наджие Аметова
Şiirler
автор
автор 8 с.Читать: Şiirler