Перейти к основному содержанию

Осман Акъчокъракълы

Osman Aqçoqraqlı

1878–1938 4 книги автор

Осман Акъчокъракълы 1878 сенеси январь 3-те Багъчасарайда догъды. Бабасы Акъчокъракъ коюнден олгъаны ичюн, сонъундан Акъчокъракълы сойадыны алды. Къоранталарында алты бала догъса да, Османдан гъайры эписи яш чагъында хасталыкълардан вефат эттилер.

Осман Акъчокъракълы 15 яшынадже Багъчасарайда яшады. Башлангъыч мектепни ве рушдиени мында битирди. О вакъытлары Багъчасарайда яшагъан ве сонъунда белли матбааджы олгъан И. Борагъанскийден хатгатлыкъ дерслерини алды. 1894 сенеси рушдиени битирген сонъ, Акъмесджитке кетип, андаки гимназияда окъуды. XIX асырнынъ сонъунда ве XX асырнынъ башында С. Петербургда орду хызметинде олып, штаб кятиби вазифесинде булунды.

1907—1909 сенелеринде Осман Акъчокъракълы Истанбул ве Къаиреде окъуды. Бир къач йыл Русиенинъ ичерисинде ве чет мемлекетлерде сеяатларда булунды. 1910—1914 сенелери Багъчасарайда кредит банкынынъ директоры оларакъ ве Китапхане джемиетининъ риясетинде чалышты. «Терджиман» газетасы иле девамлы суретте алякъадар эди.

Осман Акъчокъракълы 1917 сенесинден оджалыкъ фаалиетине башлап, «Зынджырлы медресе»де, Къырым университети ве сонъра Къырым педагогика институтында чалышты. Ильмий ишлерде буюк мувафакъиетлерге наиль олгъаны ичюн, 1920 сенелерининъ сонъунда Украина Илимлер академиясына аза сайланды.

Осман Акъчокъракълы ильки эсерлерини ордуда хызмет эткенде язды. 1899 сенеси С. Петербургда онынъ «Ненкеджан ханым дюрбеси» повести айры китап оларакъ нешир этильди. Сонъра «Крыловдан он къыссе» (1900), «Къырым гъонджелери» (1906) киби рус классиклеринден чевирильген назм джыйынтыкълары басылды. 1927 сенеси язгъан «Багъчасарай козьяш чешмеси» пьесасы Къырым Девлет театри тарафындан дефаларджа мувафакъиетле ойналгъан эди.

Ильмий эсерлеринден «Къырымны кучюк бир долашув» (1924), «Къарт муаллим ве языджыларымыздан И. Гаспринский» (1925), «Къырымда татар тамгъалары» (1926), «Джанмухаммеднинъ «Тогъайбей» поэмасы» (1930) ве онларнен дигерлери бугунь де айрыджа къыйметке ляйыкътыр.

Осман Акъчокъракълы 1938 сенеси апрель 17-де «миллетчи»ликте къабаатланып, къуршунгъа огъратылды.

Источник: З. Къуртнезир, «Къырымтатар эдиплери» (2014), статья №53 Открыть книгу-источник

Книги автора

↑