Осман Амит
Osman Amit
1910–1942 2 книги автор
Осман Амит 1910 сенеси февраль 18-де Кезлев уездининъ Буюк Денъизбаш коюнде, койлю къорантасында догъды. Он бир яшында ана-бабадан оксюз къалды. Дайысынынъ элинде тербиеленди. Къардашларыны бакъмакъ ичюн, яшлыкътан чалышмагъа меджбур олды ве кой мектебинде окъуды. 1923 сенеси Акъмесджиттеки нумюневий орта мектепке ёлланылды. Анда Осман Акъчокъракълы, Бекир Чобан-заде, Абдулла Лятиф-заде, Умер Ипчи, Джафер Гъафар, Мамут Недим киби эдебият ве медениет эрбапларындан тасиль алды. 1928 сенеси педагогика институтына кирди. Онынъ шаирлик фаалиети де тамам бу девирден башланды. Институтны битирген сонъ, «Яш къувет» газетасында, «Яш ленинджилер», «Эдебият ве культура» меджмуаларында чалышты.
Къырымда Осман Амитнинъ «Биринджи баразна» (1933), «Меним баарим» (1941) адлы шиирий китаплары басыльш чыкъты. Онынъ балаларгъа багъышлап язгъан шиирлеринден тертип этильген «Яш къардашларыма» джыйынтыгъы дженк йыллары басмаханеде гъайып ола. Осман Амит «Буюклер элифбеси», «Тиль ве язы инкишафы дерслиги» китапларынынъ муэллифлеринден бири эди. Экинджи джиан дженки арфесинде о «Сеит огълу Сейдамет» дестаны узеринде чалыша эди.
Осман Амит белли бир муддет Къырым АССР Языджылары бирлигинде эдебий меслеатчы олып чалышты.
Экинджи джиан дженки башлангъанда Осман Амит гизли иш алып бармакъ ичюн Къырымда къалдырыла. Сакъ районындаки Джагъа-Къушчы коюнде мектеп директоры ола. 1942 сенеси фашистлер оны якъалайлар. Арадан чокъ вакъыт кечмеден, март 17-де гестаподжылар оны джанаварджа ольдюрелер.
Осман Амит Пушкин, Лермонтов ве Шевченконынъ бир сыра эсерлерини къырымтатар тилине чевирген эди.
Дженктен сонъки девирде шаирнинъ «Челик давушы» (1971) адды шиирлер джыйынтыгъы, Пушкиннинъ о терджиме эткен «Балыкъчы ве балыкъ акъкъында масал» (1985) китабы нешир олунды. «Онынъ хытабы», «Мамут», «Завод акъшамы», «Сынъырда», «Улу ташкъын» киби он учь шиири «Он экилернинъ хатиреси» (1970) джыйынтыгъына кирсетильди.
Осман Амит Языджылар бирлигининъ азасы эди.
Источник: З. Къуртнезир, «Къырымтатар эдиплери» (2014), статья №103 Открыть книгу-источник
-
Birinçi barazna Осман Амитавтор 1933 · 100 с.Читать: Birinçi barazna
-
Меним баарим Осман Амит
Меним баарим
1941 · автор
автор 1941 · 18 с.Читать: Меним баарим