Перейти к основному содержанию
Сейран Сулейман

Фото: Фото из книги нашей библиотеки

Сейран Сулейман

Seyran Suleyman

1979 5 книг автор, составитель

Сейран Сулейман 1979 сенеси февраль 18-де Озьбекистаннынъ Фергъана виляетиндеки Къува шеэринде дюньягъа кельди. 1991 сенеси аилеси иле Ватаны Къырымгъа, Къарасувбазар районына кочип кельди. 1994—1996 сс. истидатлы балалар ичюн Къурман (Красногвардейск) тюрк лицейинде окъуды. 2002 сенеси Къырым девлет муэндислик-педагогика университетининъ филология факультетини битирип, филолог-тюрколог дипломына наиль олды. 2000 сенесинден итибарен «Янъы дюнья» газетасында башта мухбир, сонъра месуль кятип вазифесинде чалышты. Айны вакъытта, «Маарифчи» Ассоциациясынынъ идаре азасы оларакъ, «Маариф ишлери» газетасында ве «Тасиль» меджмуасында ишледи. 2012 сенеси «Йылдыз» меджмуасы баш муаррирининъ муавини вазифесине тайинленди. «Ильхам» эдебий бирлешмеси реберининъ 2

Сейран 2003 сенеси Украина Языджылары миллий бирлигине аза оларакъ къабул олунды. Онынъ «Уч, къальбим» (Акъмесджит, 2003 с., «Доля»), «Сенинъ козьлеринъде йылдызлар корьдим — У твоїх очах я зорi бачив» (Киев, 2003 с., «Гопак») ве «Джемден бир авуч» (Акъмесджит, 2007 с., «Доля») адлы шиирлер джыйынтыкълары чыкъты.

Эсерлери, джумледен, «Ильхам»нынъ фиданлары» джыйынтыгъында (Акъмесджит, 2000 с.), «Кунештен бир парча» — «Окрушина сонця» къырымтатар шиириети антологиясында (Киев, 2003 с.), «Тюркюн сеси» альманахында (Азербайджан, Баку, 2004 с.), «Дертли, агърылы къардашларымыз» китабында (Азербайджан, Баку, 2005 с.), «Україна — моя батькiвщина» альманахында (Киев, 2006 с.), «Къарылгъачлар дуасы — Молитва ластiвок» къырымтатар несир антологиясында (Киев, 2006 с.), «Kardes kalemler» дергисинде (Тюркие, 2008 с.), «Умют керваны» альманахында (Акъмесджит, 2010 с.), чешит йылларда «Янъы дюнья» газетасында, «Kalgay» (Тюркие) ве «Йылдыз» меджмуаларында дюнья юзю корьди. Шиир ве икяелери къырымтатар, рус, украин, тюрк ве азербайджан тиллеринде басылды. Онынъ озю де бир чокъ эсерлерни дигер тиллерден ана тилимизге терджиме этти.

Ялтада (2001 с.) ве Коктебеле (2002 с.) олып кечкен яш эдиплернинъ семинарларында, Халкъара тюркий оджаларнынъ семинарында (Истанбул, 2001 с.), I Халкъара Къырым шаирлер симпозиумында (Акъмесджит, 2003 с.), VI Халкъара тюркий шаирлер фестивалинде (Къырым, 2005 с.), II Халкъара тюркий медениети симпозиумы черчивесинде отькерильген Къырым шаирлер фестивалинде (Эски Къырым шеэри, 2006 с.), Халкъара Хазар шиир акъшамларында (Элязыгъ шеэри, Тюркие, 2006 с.), II Тюрк дюньясы эдебий меджмуалар конгрессинде (Анкъара, 2008 с.), Сапанджа ве Ялова шиир акъшамларында (Тюркие, 2010—2011 сс.), Генч шаир ве журналистлернинъ симпозиумында (Баку, 2012 с.) иштирак этерек, къырымтатар эдебиятынынъ кечмиши ве бугуньки вазиети акъкъында чыкъышлар япты. 2008 сенеси Аврасия Язарлар Бирлиги (Анкъара ш.) тарафындан тешкиль этильген Махмуд Къашгъарий адына I халкъара эдебий конкурсынынъ лауреаты олды. Конкурста гъалип чыкъкъан «Ана къайгъысы» икяеси Тюркиеде нешир олунды. Аврасия Язарлар Бирлиги ве Дюнья Генч Тюрк Язарлар бирлигининъ азасыдыр.

Къарасувбазар районынынъ Зуя къасабасында яшай.

Источник: З. Къуртнезир, «Къырымтатар эдиплери» (2014), статья №175 Открыть книгу-источник

Книги автора

↑