Перейти к основному содержанию

Шерьян Али

Şeryan Ali

1937 4 книги автор, редактор

Шерьян Али 1937 сенеси авгуси 18-де Къырымда, Акъмечит (шимди Черномор) районынынъ Джамал (шимди Низовка) коюнде дюньягъа кельди. 1944 сенеси бутюн халкъымызнен сюргюн этильди. Сюргюнликте Джиззакъкъа (Озьбекистан джумхуриети) тюшти. 1956 сенеси шеэр орта мектебини битирген Шерьян 1957— 1962 сенелери Низамий адына Ташкент девлет институтынынъ тарих-филология факультетинде окъуды. Институтны битирген сонъ, кой мектебинде озьбек тили ве эдебияты оджасы, белли бир вакъыт «Гулистан», бунынъ киби де Джиззакъ район газеталарында месуль кятип вазифесинде чалышты.

1977—1993 сенелери Джиззакъ виляети теле-радио комитетинде баш муаррир вазифесинде булунды. 1993 сенесининъ майыс айында Къырымгъа къайтты ве Сакъ районынынъ Темеш (шимди Шелковичное) коюнде ерлешти.

Шерьян Али ана тилимизде ильки эсерлерини 1950 сенелерининъ сонъларындан язып башлады ве дердж эттирди. Бугуньге къадар онынъ «Омюр далгъалары» (1974), «Чагъала» (1981), Асырдашым — сырдашым» (1991), «Мерджан данелери» (2004), «Къалем уджундаки нур» (2004), «Эки дюнья арасында» (2007), «Хатыралар юкю» (2011) киби шиирий ве несрий джыйынтыкълары нешир этильди. Шаир поэма жаенры узеринде де семерели чалышмакъта. Онынъ «Дарбе», «Ренклер тили», «Копюрлерден кечкенде» поэмалары басылды.

Муэллифнинъ бир чокъ шиирлерини шаирлерден Микола Мирошниченко, Степан Литвин, Валерий Ляхевич, Володимир Мордынь, Всеволод Ткаченко, Петро Коробчук, Виль Гримич, ДмитроГоловколар украин тилине терджиме эттилер. Шаирнинъ бир сыра шиирлери «Кунештен бир парча» къырымтатар назмининъ антологиясына (Киев, 2003) кирсетильди.

Шерьян Алининъ шиирлерине белли къырымтатар бестекярларындан ЯЯ Шерфединов, Эдем Налбандов, Февзий Алиев, Сервер Какура, озьбек бестекяры Гъ. Халикъов йырлар яздылар.

Шаир бедиий терджимелернен де огъраша. О, озьбек, азербайджан, туркмен, украин шаирлерининъ шиирлерини ана тилимизге терджиме этти. Онынъ Тарас Шевченко, А. Пушкин, Байрон ве Киплинглерден терджиме эткен эсерлери къырымтатар эдебияты дерсликлерине кирсетильдилер.

Шерьян Алиге «Эки дюнья арасында» шиирлер джыйынтыгъы ичюн Бекир Чобан-заде адына, «Хатыралар юкю» несрий джыйынтыгъы ичюн Эшреф Шемьи-заде адына эдебият мукяфатлары берильди. О, 2013 сенеси Къырым Юкъары Шурасынынъ къарарынен медениет саасындаки хызметлери ве эльде эткен къазанчлары ичюн «Къырымда нам къазангъан медениет эрбабы» фахрий унванына наиль олды.

Эдипнинъ актуал мевзулардаки эсерлери миллий матбуатымызда дердж олунып келинмекте. Шерьян Али 1982 сенесинден Языджылар бирлининъ азасыдыр. 2006 сенесинден «Ильхам» эдебий бирлешмесининъ реберидир. Сакъ районынынъ Лесновка коюнде яшай.

Источник: З. Къуртнезир, «Къырымтатар эдиплери» (2014), статья №150 Открыть книгу-источник

Книги автора

↑