Перейти к основному содержанию

Шевкет Рамазанов

Şevket Ramazanov

1941 1 книга автор

Шевкет Рамазанов (Шевкет Къырымлы) Къырым Мухтар Джумхуриетининъ Куйбышев районындаки Черкезкирман коюнде 1941 сенеси октябрь 27-де дюньягъа кельди. Бабасы Алядин акъай дженк йыллары сарымда къалгъан Акъяр шеэринде эляк олды. Бутюн халкъымызнен юрттан сюргюн этильген Шевкет Рамазановнынъ къорантасы Озьбекистаннынъ Ташкент виляетине тюшти. Шевкет 1958 сенеси Сырдарья шеэриндеки 1-нджи орта мектепни битирди. 1960 сенеси Самаркъанд кооператив техникумында тасиль алды. Учъ йыл кооперация тешкилятында икътисатчы, «Малик» совхозы ишчилер кооперациясына ребер олып чалышты.

1961 сенеси Шевкет Рамазанов Ташкент Девлет университетининъ журналистика болюгине гъиябий кирди. 1965 сенесинден «Сырдарьинская правда» виляет газетасында мухбир, баш муаррирнинъ биринджи муавини вазифелеринде чалышты. Бу девир ичинде университетни, Москва Алий фыркъа мектебини окъуп битирди, Ташкент икътисадият институтынынъ гъиябий аспиранты олды.

Шевкет Рамазанов 1974 сенеси янъы тешкиль олунгъан «Джизакская правда» газетасына муаррир тайин олунды, 1980 сенеси «Йылдыз35 меджмуасы баш муаррирининъ муавини, 1982 сенеси «Ленин байрагъы» (шимди «Янъы дюнья») гаетасы муаррирнинъ муавини, Къырымгъа къайтмасына бир йыл къалгъанда Ташкенттеки Гъафур Гъулам адына Эдебият ве санат нешриятынынъ къырымтатар болюги муаррири вазифелеринде чалышты. 1989 сенеси Акъмесджитте ана тилимизде ильки чыкъкъан «Достлукъ» (шимдики «Къырым») газетасына муаррир тайин этильди. О бу вазифени …., сенесине къадар эда этти.

Шевкет Рамазановнынъ «Корюшюв» адлы биринджи икяеси 1967 сенеси «Сырдарьинская правда» газетасында дердж олунды. О вакъыттан берли онынъ икяелери, повестьлери чешит газеталарда, меджмуаларда ве ортакъ джыйынтыкъларда къырымтатар, рус, украин, озьбек, азерий, таджик тиллеринде дердж олундылар. Бу эсерлернинъ бир къысмы языджынынъ «Джевизлик» (1985) китабына кирсетильди. Шевкет Рамазанов «Горькие слёзы Салгира95 кинофильмининъ муэллифидир.

Эдипнинъ янъы язаяткъан «Джеэннемден къайткъанлар» романынынъ «Ярым асыргъа мусавий бир афта» адлы биринджи китабындан парчалар 1999 сенеси июнь 19-дан башлап «Къырым» газетасында дердж олунды.

Шевкет Рамазанов эсерлерини къырымтатар ве рус тиллеринде язды.

Шевкет Рамазанов миллий арекетимизде 1959 сенесинден иштирак эткен эди. О «Шан-Шурет» ордени ве эки медальнен, бунынъ киби де5 Озьбекистан Юкъары Советининъ Фахрий ярлыкъларынен мукяфатланды. Украинада нам къазангъан журналист унванынен такъдирленди. 1994 сенеси о Къырым Юкъары Советине векиль сайланды. Шевкет Рамазанов Украина Языджылары бирлигининъ азасы эди. О, 2011 сенеси октябрь 19-да Акъмесджит шеэринде вефт этти.

Источник: З. Къуртнезир, «Къырымтатар эдиплери» (2014), статья №158 Открыть книгу-источник

Книги автора

↑