Перейти к основному содержанию
урф-адетлеримизни унутмайыкъ

ШАРКЪЛЫЛАРГЪА
Тюрклернинъ музаффариети мунасебетимен
Джуреклер ойнай, къальплер джайнай, 
Тюрк акъкъын истей, ал къаны къайнай, 
Хаялджы юнан масхара болды, 
Озь эйилигимен юзю къара болды.
 
Акъкъымы бермем, аларман — дей тюрк, 
Намусым кефиль саларман — дей тюрк. 
Бир орьнек болсын шаркъкъа бу къавгъа, 
Бир огют болсын ольгенге, савгъа.
 
Тюркнинъ къавгъасы эмельсиз тугуль, 
Кемалнынъ сёзю темельсиз тугуль, 
Бутюн шаркъ ичюн къылычын къайрай, 
Онынъ ичюн бугунь тиллерге джайрай.
 
Джашлыгъы тюркнинъ «тюрк изин» тапты, 
Хинд де эснеди, пармагъын къапты, 
Мысыр да бильди, макъсадын айтты, 
Аджем де шашты, сёзюнден къайтты.
 
Бельки, бу къавгъа шай узар кетер, 
Бельким, коп ерни тер-темиз этер! 
Узасын, кетсин селлердай акъсын, 
Акъсакъал шаркълы зевкъына бакъсын.
 
Инглиз келе, франсыз къайта, 
Дипломат хаин яланлар айта, 
Инанма, эй тюрк, арыгъынъ ёрма, 
Оларгъа къаршы саф темиз турма. 
 
Шаркълынынъ, тюркнинъ тек джаны бардыр, 
Эр шейден юксек бир шаны бардыр, 
Таптатмаз шанын, джигитдай олер, 
Намускъа борджын къаныман тёлер.
 
Айдынъыз, айды, джигитлер, айды! 
Къутургъан джавнынъ аягъы тайды, 
Барсын шу шаркъта къавгъалар болсын 
Эски джылгъалар кене къан толсын!
Октябрь 4, 1922. Акъмесджит
 

Категория

Источник
http://anaurt.com