Перейти к основному содержанию
урф-адетлеримизни унутмайыкъ

 

Арсен Бекиров озюнинъ иджадий фаалиетини, 1991 сенеси, Акъмесджид шеэриндеки Пионерлер эвинде "Фиданлар" балалар ансамблинде, сонъра Профсоюзлар медениет сарайы янындаки "Теселли" ансамблинде артист-вокалджы оларакъ башлады. 2004 сенеден итибарен о, кенди эмек фаалиетини "Къырым" адына къырымтатар фольклор ансамблинде артист-вокалджы вазифесинде девам эте. Айны шу сенеси де, о, П.И. Чайковский адына Акъмесджид музыка окъув юрду вокал болюгининъ "Музыка санааты" ("Музыкальное искусство") факультетини битирди.  2010 сенеси исе, С.С. Прокофьев адына Донецк девлет музыка академиясынынъ Акъмесджиддеки "Хор такъымыны идаре этюв" ("Хоровое дирижирование") болюгини екюнледи..
     Арсен Бекиров озюнинъ вокал истидаты, юксек профессиональ усталыгъы, эр бир эсерни образлы иджра этюв киби шахсий иджадий хусусиетлери иле айрылып тура. Лирик тенор саибининъ – йырджынынъ репертуарында бир сыра улу композиторларнынъ – классиклернинъ эсерлери мевджут.
     Арсен Бекировнынъ иджадында Къырым миллий халкъ тюркюлери айрыджа ерни тута. Йырджыгъа миллий фольклорны менимсевде, Украина ве Татарстан Джумхуриетинде хызмет косьтереген санаат эрбабы Сервер Какуранынъ мектеби буюкроль ойнады. Йырджы тарафындан иджра этильген эски тюркюлерден "Къара къыз" йыры динълейиджиге озюнинъ аджайип арарети ве лиризми иле тесир эте,  мердлик ве романтик дуйгъуларны уянткъан тылсымлы бир эеджан оны эсир ала. "Ногъай бейитлери", "Язгъа чыкъсам", "Алчачыкъ эвнинъ тёпеси" киби шакъа къырымтатар халкъ йырларыны иджра эткен "Къырым" ансамбли солистинде озюне хас вокал техниканы, миллий аэнкни дуймакъ, эшитмек мумкюн.
     Арсен Бекировнынъ чокътарафлы истидаты, онынъ актёрлыкъ усталыгъында да ачыла. Къырым миллий дюгюнининъ эски мерасимини нумайыш япкъан "Тойгъа давет этемиз" театролаштырылгъан спекталде, башроль и ойнагъаны, 
 
банаки фикирге ачыкъ-айдын мисаль ола билир. Артист киевнинъ миллий чизгисини - табиатыны косьтерген айдын ве айны заманда муреккеп образыны ярата бильди.
 
Arsen Bekirov özüniñ icadiy faaliyetini, 1991 senesi, Aqmescid şeerindeki Pionerler evinde "Fidanlar" balalar ansamblinde, soñra Profsoyuzlar medeniyet sarayı yanındaki "Teselli" ansamblinde artist-vokalcı olaraq başladı. 2004 seneden itibaren o, kendi emek faaliyetini "Qırım" adına qırımtatar folklor ansamblinde artist-vokalcı vazifesinde devam ete. Aynı şu senesi de, o, P.İ. Çaykovskiy adına Aqmescid muzıka oquv yurdu vokal bölüginiñ "Muzıka sanaatı" ("Muzıkalnoye iskusstvo") fakultetini bitirdi.  2010 senesi ise, S.S. Prokofyev adına Donetsk devlet muzıka akademiyasınıñ Aqmesciddeki "Hor taqımını idare etüv" ("Horovoye dirijirovaniye") bölügini yekünledi..
     Arsen Bekirov özüniñ vokal istidatı, yüksek professional ustalığı, er bir eserni obrazlı icra etüv kibi şahsiy icadiy hususiyetleri ile ayrılıp tura. Lirik tenor saibiniñ – yırcınıñ repertuarında bir sıra ulu kompozitorlarnıñ – klassiklerniñ eserleri mevcut.
     Arsen Bekirovnıñ icadında Qırım milliy halq türküleri ayrıca yerni tuta. Yırcığa milliy folklornı menimsevde, Ukraina ve Tatarstan Cumhuriyetinde hızmet kösteregen sanaat erbabı Server Kakuranıñ mektebi büyük rol oynadı. Yırcı tarafından icra etilgen eski türkülerden "Qara qız" yırı diñleyicige özüniñ acayip arareti ve lirizmi ile tesir ete,  merdlik ve romantik duyğularnı uyantqan tılsımlı bir eyecan onı esir ala. "Noğay beyitleri", "Yazğa çıqsam", "Alçaçıq evniñ töpesi" kibi şaqa qırımtatar halq yırlarını icra etken "Qırım" ansambli solistinde özüne has vokal tehnikanı, milliy aenkni duymaq, eşitmek mümkün.
     Arsen Bekirovnıñ çoqtaraflı istidatı, onıñ aktörlıq ustalığında da açıla. Qırım milliy dügüniniñ eski merasimini numayış yapqan "Toyğa davet etemiz" teatrolaştırılğan spektalde, baş rolni oynağanı, 
 
banaki fikirge açıq-aydın misal ola bilir. Artist kiyevniñ milliy çizgisini - tabiatını köstergen aydın ve aynı zamanda mürekkep obrazını yarata bildi.
 
 
Источник
http://anaurt.com