Перейти к основному содержанию
урф-адетлеримизни унутмайыкъ

 

Инсанларны сатмакъ-сатын алмакъ проблеми Украина ичюн муим меселелерден бири олып къалмакъта. «Джанлы малнен» алыш-вериш япкъан сатыджылар инсанны къысымларгъа я да къуллыкъкъа сатмакъ мумкюн олгъан бир механизм сыфатында корелер. Теэссюф ки, шимди бир чокъ яшлар бир кереден чокъ пара къазанмакъ пешинделер. Айны бойле генч­лер «джанлы мал» авджыларынынъ тузагъына тюшелер. Олар яшларны алдап, къармакъларына илелер.

Джемаат бу чиркин ишлерге лякъайд бакъмадан, фааль курешмеси лязим. «Боразан» информацион-ярыкъландырув меркези Миграция боюнджа халкъара тешкилятнынъ къолтутувында мезкюр проблем боюнджа китап нешир этмек тешеббюсинен чыкъмакъта. Китапнынъ керчектен де халкъ китабына чевирильмеси ичюн оны Украинанынъ келеджеги ичюн къайгъыргъан инсанларнынъ иджадий эсерлеринден тертип этмек козьде тутула.

Шу мунасебетнен «Боразан» информацион-ярыкъландырув меркези Къырымда инсан алыш-веришининъ огюни алмакъ меселеси боюнджа иджадий ишлерни 2008 сенеси декабрь айына къадар шу адреске ёлламагъа давет эте: Интернациональная сокъагъы, 43-А, Белогорск ш., Къырым, Украина, 97600 (ишнинъ мытлакъа электрон шекили ве муэллифнинъ ресими экленмели я да invest-inform@rambler.ru мензили боюнджа ёлланмалы). Энъ яхшы эсерлер айны адлы китапкъа киреджек. Омюрден алынгъан адиселер ве проблемни чезюв боюнджа энъ оригиналь гъаелер булунгъан эсерлерге зияде эмиет бериледжек. «Боразан» меркези иштиракчилерге маддий мукяфат ишандырмай, лякин энъ яхшы эсерлер муэллифлерининъ ресимлеринен китапта ер алып, бу китап китапхане ве Къырым джемаат тешкилятларына дагъытыладжакъ. Бунынъ киби де муэллифке китапнынъ 5 нусхасы бериледжек.

«Боразан» информацион-ярыкъландырув меркези.

Категория

Источник
http://www.yanidunya.org