Aqmescitniñ Maryino qasabasında da "Uyan, menlik" bala lageri açıldı

Keçken raatlıq künleri, iyün 21-22-de Aqmescitniñ Maryino qasabasında diniy-maarif lageri açıldı. Bu "Uyan, menlik" leyihasınıñ ekinci lageri oldı. Leyiha Qırım musulmanları diniy idaresi ve qırımtatar cemaat ve gençler teşkilâtlarınıñ işbirliginde teşkil etilmekte. Maryino qasabasında bu lagerge 25 bala keldi.

10-16 yaşındaki balalarğa İslam dini, qırımtatarlarnıñ tarihı, medeniyeti ve edebiyatı boyunca dersler berildi. Bundan da ğayrı, balalar içün meraqlı ve faydalı oyun ve konkurslar azırlanıldı.

"Uyan, menlik" lageri bütün yaz devamında, cuma ertesi ve bazar künleri keçirilecek.

Aqmescit şeerinde işbu lager endi eki qasabada keçirile (Aqmeçit, Maryino). Eñ yaqın vaqıtta leyiha Boğurça (Kamenka) qasabasında ve Mamaq (Stroganovka) köyünde teşkil etilecek. Bundan da ğayrı, Qırımnıñ diger şeer ve köylerinde, qırımtatarlar toplu yaşağan qasabalarda da "Uyan, menlik" lageriniñ teşkil etilmesi planlaştırıla.

Tafsilâtlı malümat içün telefonlar: Aqmeçit (Ak-Meçet) - 0999431886, Boğurça (Kamenka) – 0501675108, Maryino – 0953878936, Bor-Çoqraq (Fontanı) – 0662003526. "Uyan, menlik" leyihasınıñ umumiy koordinatorı – 0953878936.

 

QMDİ matbuat hızmeti