Къырым мухтар джумхуриетинде хызмет косьтерген артист, "Къырым" адына къырымтатар фольклор ансамблинде вокалджы
Асие Саале озюнинъ эмек ве иджадий фаалиетини, 1992 сенеси Къарасувбазар районы Медениет эвиндеки "Ешиль Ада" эстрада ансамблинде, артист-вокалджы сыфатында башлады. 1996 сенесинден бу куньге къкдар о, "Къырым" адына къырымтатар фольклор ансамблинде артист-вокалджы оларакъ чалыша.
Асие Саале, 2009 сенеси Къырым медениет, санаат ве туризм университетининъ "Музыка санааты" факультетининъ вокал болюгини битирди. Генч артист профессиональ усталыкъ, айдын иджадий хусусиет, сана джазибелиги киби чизгилерге маликтир. Онынъ сопраносы (юксек сеси), озюне хас дюльбер аэнк ве зарур олгъан къувет чизгилери иле айрылып тура. Колоратурасынынъ (хафиф сопраносынынъ) сафлыгъы, там ве догърулыгъы, чокътарафлы эстетик янъгъыравы Асие Саалеге бир сыра классик композиторларнынъ эсерлеринде мевджут чешит ренкли музыка палитрасыны яратмагъа имкян догъура.
Асие Сааленинъ репертуары Къырым миллий вокал мирасынынъ баягъы бир къысымыны къаврап ала. "Ёсмам", "Эреджебим", "Алтын юзюк" киби Къырым халкъ тюркюлери акъикъатта онынъ, яни репертуарынынъ зийнетини, ярашыгъыны акс эте. Ачыкъ-айдын халкъ усулында иджра этюв къабилиетине малик олгъан йырджыгъа, эски миллий аньанелерни ве урф-адетлерни тюркюлер эм де мевзуи (тематический) сахна спектакллер вастасы иле, терен мундериджели аэнкле эм де халкъчанлыкъле иджра этмеге имкян яратты. "Тойгъа давет этемиз" мевзуи сахна спектаклдеки келин образы, артистнинъ энъ гузель образларындан биридир. Йырджы, мезкюр образны рухий акъикъат ве терен ис-дуйгъулар иле толдура. Албу исе, сейирджиге баш къараманнынъ эм эеджаныны, эм де къуванчыны анъламагъа, нишан ве дюгюн киби эеджанлы мерасимлерни корьмеге имкян бере.
Асие Саале, "Къырым" фольклор ансамбли эркянында Полония, Романия, Булгъарстан, Тюркие, Русие киби мемлекетлерде булунды. Бир сыра фестиваллерде иштирак япты. О, 2009 сенеси, Тюркие Миллий телевидениеси тарафындан, "Джиан халкълары тюркюлери" сырасында (циклинде) "Къырым акъшамлары" денильген эки телевизион яйынлары чекимине (сьёмкасына) давет этильген эди. Мезкюр тарихий телевизион яйынлары, Къырымлыларнынъ гъает зенгин фольклор санаатыны джиан мыкъясына чыкъармакъ - дюньягъа косьтермек киби реклама ролюни одеди.
Асие Саале, 2010 сенеси "Къырым Мухтар Джумхуриетинде хызмет косьтерген артист" деген Фахрий унвангъа наиль олды.
Qırım muhtar cumhuriyetinde hızmet köstergen artist, "Qırım" adına qırımtatar folklor ansamblinde vokalcı
Asiye Saale özüniñ emek ve icadiy faaliyetini, 1992 senesi Qarasuvbazar rayonı Medeniyet evindeki "Yeşil Ada" estrada ansamblinde, artist-vokalcı sıfatında başladı. 1996 senesinden bu künge qkdar o, "Qırım" adına qırımtatar folklor ansamblinde artist-vokalcı olaraq çalışa.
Asiye Saale, 2009 senesi Qırım medeniyet, sanaat ve turizm universitetiniñ "Muzıka sanaatı" fakultetiniñ vokal bölügini bitirdi. Genç artist professional ustalıq, aydın icadiy hususiyet, sana cazibeligi kibi çizgilerge maliktir. Onıñ sopranosı (yüksek sesi), özüne has dülber aenk ve zarur olğan quvet çizgileri ile ayrılıp tura. Koloraturasınıñ (hafif sopranosınıñ) saflığı, tam ve doğrulığı, çoqtaraflı estetik yañğıravı Asiye Saalege bir sıra klassik kompozitorlarnıñ eserlerinde mevcut çeşit renkli muzıka palitrasını yaratmağa imkân doğura.
Asiye Saaleniñ repertuarı Qırım milliy vokal mirasınıñ bayağı bir qısımını qavrap ala. "Yosmam", "Erecebim", "Altın yüzük" kibi Qırım halq türküleri aqiqatta onıñ, yani repertuarınıñ ziynetini, yaraşığını aks ete. Açıq-aydın halq usulında icra etüv qabiliyetine malik olğan yırcığa, eski milliy ananelerni ve urf-adetlerni türküler em de mevzui (tematiçeskiy) sahna spektakller vastası ile, teren mündericeli aenkle em de halqçanlıqle icra etmege imkân yarattı. "Toyğa davet etemiz" mevzui sahna spektakldeki kelin obrazı, artistniñ eñ güzel obrazlarından biridir. Yırcı, mezkür obraznı ruhiy aqiqat ve teren is-duyğular ile toldura. Albu ise, seyircige baş qaramannıñ em eyecanını, em de quvançını añlamağa, nişan ve dügün kibi eyecanlı merasimlerni körmege imkân bere.
Asiye Saale, "Qırım" folklor ansambli erkânında Poloniya, Romaniya, Bulğarstan, Türkiye, Rusiye kibi memleketlerde bulundı. Bir sıra festivallerde iştirak yaptı. O, 2009 senesi, Türkiye Milliy televideniyesi tarafından, "Cian halqları türküleri" sırasında (tsiklinde) "Qırım aqşamları" denilgen eki televizion yayınları çekimine (syomkasına) davet etilgen edi. Mezkür tarihiy televizion yayınları, Qırımlılarnıñ ğayet zengin folklor sanaatını cian mıqyasına çıqarmaq - dünyağa köstermek kibi reklama rolüni ödedi.
Asiye Saale, 2010 senesi "Qırım Muhtar Cumhuriyetinde hızmet köstergen artist" degen Fahriy unvanğa nail oldı.
Асие Саале Къара биберим
Источник
http://medeniye.org/forum/index.php/topic,1133.0.html