Saqavlanma, ey, kadây!
Aqşam ustü işten soñ, çıqtım evden kezmege.
Soñ oylandım, yol ustü kireyim dep emceme.
Qart kişidir, al-hatir sorap oteyim, dedim.
Subetleşip, bir qave içip keteyim, dedim.
Selâm berip kirdim men, keçtim evniñ törüne.
Baqsam – orta qapıdan bir koletke korüne…
- Emce, - dedim, kim bar ya? Musafirmi? Ne yerden?..
Şay degence, torsayıp, bir yaş çıqtı içerden.
Men hoşkeldi aytqance, - Privetik! – dedi o.
Yahşı eslep qarasam, yaqın soyım edi o.
- E…hoş keldiñ, qardaşım, işler nasıl, qaydasıñ?
Qana, bizge de buyur, oynap-kulip qaytarsıñ…
- Net, net, tağa, - dedi o. - İş cuda kop, ya speşu.
Bizde zavtra ekzamen, dissertatsiya men pişu.
- Toqta! – dedim yavaştan, baqıp onıñ yuzüne. -
Set ustüne oturçe, - dedim baqıp kozüne.
Maña qara, qardaşım, ozüñ gulday qoquysıñ,
Oz tiliñde laf etmey, sen masal oquysıñ?
Qana, seni kim aytar, ekimlikke oquy, dep…
Bu medeniy bir yigit, şifa olıp qoquy, dep…
- A… ya to, brat, ne maña zameçaniye yapasız?
Siz vsegda bunaqa bir priçina tapasız.
İh bin hazır – diplomant, ne uçite vı menâ.
Siz zabottes, kim budet vaşa doçenka Leylâ.
Gud bay, dâdâ! – dep turdı o oturğan yerden.
Tap yuregim sıqıldı, şır-suv oldım terimden.
- Toqta! – dedim cekirip, basıp onıñ tizine. –
Oturmasañ, yol açıq, bir qulaq sal sözüme.
Er bir gulniñ yaprağı, oz qoqusı, tusu bar.
Er bir aşnıñ oz adı, biberi bar, tuzu bar.
Er bir tilniñ lezeti, oz cumlesi, sözü bar.
Saqavlanma, ey kadây, er işniñ bir kozü bar.
Qana kimge kerek bu şimdi sen laf etken "til"?
İsteseñ sen alim ol, lâkin oz tiliñni bil.
Mına şimdi subette bir araba laf ayttıñ,
Bir cumleni oñğarmay, beş türlü til muğayttıñ.
Senday oquğan yigit boyle bozsa tilini,
Soñ başqası ne yapsın, qurutmayıp gulüni?..
Seniñ ana tiliñde destanlar bar, yırlar bar,
Bu tilde yır diñlegen çalbaş dağlar, qırlar bar.
Bu tilde yır yırlaylar babañ, anañ, butün halq,
Bu tilde çıñ aytışa sevda qız ile boydaq.
Oz tilinen baht tapa emekte halq, sen bir baq,
Aytçı, saña bu tilni bozmağa kim berdi aq?!
Anañ seni erkelep : "Mayn kinder" - demegen,
Aq sütüni o saña bu umütnen bermegen.
Urmetleseñ anañnı, onıñ ana tilini,
Tek o vaqıt olursıñ sevimlisi iliñniñ.
Oz tilini bilmegen yurek yırın sozarmı?!
Ayağında nalı yoq at çapışta ozarmı?!