Н.Челебиджиханнынъ балалыгъы, талебелик чагъы

...Уджу-буджагъы корюнмеген чёллер... Дюльбер, назик, къулан шиддетли, къудретли, джумерт ве саран чёллер. Иште, шу чёллер багърында Буюк-Сонакъ коюнде бинъ секиз юз сексен беш сенеси Ибраим Челебининъ къорантасы даа бир джангъа артты. Огъланчыкънынъ адыны Номан къойдылар. Номан гъает сезгир, инсан адалетсизлигине инджеден, ичинден сесленген бир бала эди. Онынъ балалыгъы, бабасынынъ варлыкълы девиринде, догъмуш Буюк-Сонакъ коюнде, къулан чёллерде, севимли атынынъ устюнде кечкендир. Бутюн вакътыны бабасынынъ элинде чалышкъан ыргъатлар, чобанлар, чолтуракълар, чоралар, джоралар киби адий халкъкъа менсюп койлюлер арасында кечире, озюнинъ зенгин баласы, акъсуеклер тавабасындан олгъаныны ич бир арекетинде, ич бир джумле-и-келимесинде дуйдурмай, кендиси де дуймай эди. Номан табиатынджа мерхаметли бала эди. Лякин, о, агъламагъа бильмей эди. Онынъ агълагъаныны корьген адам пек аздыр. О, къуветли севги, къуветли ираде, къуветли рух саиби, дедигини япкъан, дедигинден таймагъан, дедигини озюне хас бир сувукъкъанлыкъ ве ираде иле яптыргъан, керек олмагъан, арткъач, бош арекетлер япмагъан бир бала олып осьти. Онынъ ичюн «енъильмек» сёзю ёкъ эди. Яныкъ ве истираплар не къадар къуветли олмасын, онынъ «юзю агъарыр, манълайы терлер, санки козьяшлары даа корюнмеден, топланмадан бувгъа дёнип, учып кетер эди». Номан башлангъыч тасилини кой мектебинде алды. Лякин кой мектебиндеки тасилини токътатмагъа меджбур олды. Къырымнынъ онларнен койлериндеки мектеплер, бу джумледен Сонакътаки кой мектеби рус мемурлары тарафындан къапатылды. Юзлернен, бинълернен къырымтатар балачыкълары тасильден марум этильди, бильги оксюзлигине быракъылды. Арадан он йыл кечкен сонъ Номан бу мудхиш адисени «Къарылгъачлар дуасы» икяесинде тасвирледи. Джиенлери бильгисиз, джаиль къалмамасы ичюн Абдулалим Челеби ве Эбу-Бекир Челеби онъа ильк вакъытларда маддий ве маневий ярдымда булундылар. Чар укюметининъ эмиринен кой мектеби къапатылгъан сонъ Номанны Джанкой дживарындаки Акъчора медресесине бердилер*. Мында бир къач вакъыт окъугъан сонъ Номан Акъмесджит рушдиесине авушты. Бу ерде де чокъ къалмады. Тасилини Багъчасарайда Зынджырлы медреседе девам эттирди.