Миллий меселе тезкере талап этмей

«Миллий вазифе тезкере иле дегиль, миллетнинъ арзусы иле япыла. Коресинъ де, мен де аскерим, мен де униформамны аля даа чыкъарып атамадым. Миллет манъа итимад этерек, мени бу левазимге кетирди, ве манъа месуль вазифени авале этти. Демобилизация акъкъындаки тезкеремни беклеген олсам, бир къач айбеклемек керек оладжакъты. Эр (бир) куннинъ йылларгъа тенъ кельген заманында тезкеремни беклемекнен вакъыт джойып оламайым. Эбет, орду менсюби оларакъ, миллий ишке атылмакъ иле кендими телюке астына къойгъандырым. Бунынъ ичюн мени такъип эте билелер. Джезалайда билелер. Лякин миллети ичюн, онынъ истикълялы огърунда курешке атылгъан бир инсан бутюн телюкелерни козь огюне алмалыдыр. Бу фааль куреш куньлеринде миллет санъа месуль бир вазифе теклиф этер экен, сен де миллетинъ ичюн бутюн федакярлыкъны козь огюне алыр экенсинъ, уджунда олюм телюкеси олса биле насылдыр бир тезкере беклемеден, ишке киришмелисинъ. Миллий вазифе мукъаддестир. Миллет огърунда ольмек – шерефлернинъ энъ буюги, энъ ульвийсидир. Шундан эмин олмалысынъ ки, бу миллет сени гъайып эткен куню юзлернен Усеинни даа етиштирмеге икътидарлыдыр. Иште, миллетнинъ уриет ве истикълял акъларыны бир чокъ джанларыны феда этерек, къанлы куреш нетиджесинде эльде этеджектир. Айды, джоймагъа вакътымыз ёкъ: вазифе башына!...»