Н.Челебиджихан Санкт-Петербургда

Номан Челебиджихан бинъ докъуз юз он эки сенеси Истанбул дарульфунуныны аля дереджеде битирип олдукъча ишленген ве белли бир мундериджеге малик олгъан миллийидеал иле Къырымгъа къайтып келе. Лякин арадан чокъ кечмеден Санкт-Петербурггъа кете. Н.Челебиджиханнынъ анда кетмесининъ макъсады, биринджиде, тасилини девам эттирмек, экинджиде, рус инкъиляпчыларынынъ фаалиетлеринен якъынджа таныш олмакъ эди. Джебинде Петербурггъа барып чыкъаджакъ къадар парасы олгъан Челебиджихан Русиенинъ пайтахтында гъает факъир бир аят кечире. Таш тёшейиджи оларакъ чалыша, русларны, Петербургдаки инкъилябий рухнынъ инкъиляп бешиги оларакъ танылгъан Психоневрология институтына окъумагъа кире. Психоневрология институтынынъ юридик болюгинде окъуй элли. Парасызлыкъ себебинден Н.Челебиджихан хорлукъ чеке, дерслерине етерлик дереджеде эмиет берип оламай. О девирлерде Петербургда ве Къырымда мухтадж талебелерге къырымтатар ярдым джемиетлери бар эди. Лякин Номан Челебиджихан вазиети не къадар агъыр олмасын Къырымдакилерге ярдым сорап мураджаат этмеди. Петербургдаки джемиет де Челебиджиханнынъ истидат ве къабилиетини, севиесининъ юксеклигини анъламагъа арекет этмеди. Вельасыл, Челебиджиханнынъ энъ азаплы куньлери Петербургда кечкендир. Петербургда аяты парасызлыкъ, ёкъсуллыкълар панджасында инълесе де, Номан Челебиджихан Психоневрология институтынынъ илери бакъышлы профессор ве талебелеринен темаста булуна, русларнынъ илим саасында илери кеткенлерини тюшюне, къырымтатарларнен къыяс эте, сыкъыла, келеджек истикъбаль русларнынъ элинде оладжагъыны ойлап, истирап чеке.